LAUTÉM, 07 janeiru 2022 (TATOLI)—Primeiru-Ministru (PM), Taur Matan Ruak, husu ba Lautém-oan atu aumenta produsaun ai-han tanba iha Orsamentu Jerál Estadu (OJE) 2022 Governu prevee orsamentu hamutuk millaun $80 atu sosa produtu lokál.
“Husu ba autoridade lokál no populasaun hotu atu amenta produsaun ai-han iha rai-laran, nune’e bele hatún importasaun hodi osan sirkula fali iha rai-laran. Governu iha esperiénsia durante implementa Cesta Bázika, empreza sira sosa foos no batar lokál, maibé la hetan tenki lori fali hosi rai-li’ur mai. Ha’u husu imi iha hare no batar atu fa’an,” Xefe Governu hateten iha ámbitu diálogu komunitáriu, iha Merkadu Lama, postu administrativu Lospalos, munisípiu Lautém, sesta ne’e.
PM konsidera osan ne’ebé prevee boot no sai difikuldade ba autoridade lokál no populasaun sira, maibé nu’udar dezafiu ida atu halo ezersísiu.
“Ha’u kontente tanba ho programa Cesta Bázika iha tinan 2020 ita-nia natar no to’os amenta, ema komesa badinas halo atividade produsaun,” nia akresenta.
Povu agrikultór Lautém presiza tratór no irrigasaun
Iha fatin hanesan, Xefe suku Fuiloro, postu administrativu Lospalos, munisipiu Lautém, Victor Dias Quintas, preokupa tebes atu hasa’e produsaun ai-han, tanba tratór ne’ebé Ministériu Agrikultura no Peska (MAP) atribui, daudaun ho kondisaun a’at hotu no seidauk hadi’a to’o agora.
“Ami postu administrativu Lospalos atu fila rai laiha tratór, tanba iha 40-resin maibé laiha orsamentu manutensaun ne’ebé agora para de’it iha natar, to’os no uma kotuk,” Líder komunitáriu dehan.
Nune’e mós, Administradór postu administradór Tutuala, Ângelo de Araújo, kontente no apresia ho inisiativa Governu, atu hasa’e produsaun rai-laran.
“Ita-nia kompromisu oinsá atu hasa’e produsaun rai-laran, maibé realidade iha postu Tutuala durante ne’e iha de’it tratór ida no komunidade barak mak seidauk asesu hodi fila rai. Ami tinan-tinan enfrenta hela problema ida-ne’e, tanba ne’e maka presiza apoia tratór,” nia akresenta.
Aleinde ne’e agrikultór iha Lautém presiza irrigasaun tanba durante ne’e sira halai natar uza de’it udan-been.
Hatán ba preokupasaun ne’e, Sekretáriu Estadu Peska, Elídio de Araújo, hateten, tratór ne’ebé koloka iha Lautém hamutuk unidade 41, lima tama ba iha leilaun, funsiona hela 17, no tratór a’at 19.
“Hirak ne’ebé avaria ami koko halo menutensaun, maibé ita-nia spareparts iha Timór laiha, ho situasaun COVID-19 ita labele hatama hosi rai-li’ur, tanba ne’e tratór a’at ne’e seidauk hadi’a hotu, la’ós de’it iha Lautém maibé iha mós munisípiu sira seluk,” governante ne’e esplika.