Komunidade Tutuala hanaran foho ne’e Ili Kere-kere, ne’ebé foti husi lian materna ida iha area ne’eba mak Fataluku. Iha Lian Fataluku, Ili katak Foho no Kere-kere katak Makerek, nune’e Ili Kere-kere katak Foho Makerek.

Ili Kere-Kere mak foho ka fatuk kuak ida ne’ebé nia ezistensia úniku teb-tebes iha Rai Doben Timor-Leste, ne’ebe mak nakonu ho pintura ka imajem sira ne’ebé deskoňesidu teb-tebes, ne’ebe mak to agora ema lahatene nia orijem husi ne’ebé no nia mosu tinan hira ona. Tuir Peskizador balun hateten katak foho refere nia ezistensia mosu tinan atus ba atus ona, ho razaun ida katak imajem refere mai husi Beiala sira ne’ebe mak dala-barak ekspresa sai sira nia ideia ka sentimentu ruma liu husi hakerek iha fatuk ka foho lolon ne’e. Maibe Populasun ne’ebé mak hela besik area refere mos lahatene historia lolos husi foho ne’e rasik, sira so bele hateten katak imajem sira ne’ebe mak iha fatuk lolon ne’e heransa husi avo sira. Foho refere iha parte Leste Husi Timor, munisipiu Lautem, postu administrativu Tutuala. Ili kere-kere agora dadaun sai hanesan Fatin Turismo ida ne’ebe mak atrai teb-tebes vizitantes sira liu-liu husi Turista estanjeiru sira ne’ebe mak mai vizita Rai Doben Timor Leste. Iha ne’eba Vizitante sira livre atu vizita fatin Turismu hirak ne’e, no karik laran kman bele hakat liu hodi hare Illa Jaco no fatin turismu sira seluk ne’ebe mak eziste iha Rai Doben ne’e inklui Foho Ili Kere-kere.

© 2020 Autoridade Municipiu Lautem