𝐋𝐨𝐬𝐩𝐚𝐥𝐨𝐬, 𝐊𝐢𝐧𝐭𝐚-𝐟𝐞𝐢𝐫𝐚, 𝟏𝟑 𝐌𝐚𝐫𝐬𝐮 𝟐𝟎𝟐𝟓

Nonu Governu Konstituisionál ne’ebe lidera husi 𝐏𝐫𝐢𝐦𝐞𝐢𝐫𝐨 𝐌𝐢𝐧𝐢𝐬𝐭𝐫𝐨 (𝐏𝐌-𝐑𝐃𝐓𝐋) 𝐊𝐚𝐲 𝐑𝐚𝐥𝐚 𝐗𝐚𝐧𝐚𝐧𝐚 𝐆𝐮𝐬𝐦ã𝐨 liu husi Ministériu Finansas (MF) no Ministériu Administrasaun Estatal (MAE) hala’o Sorumutu Koordenasaun no “Konsultasaun Sidadania” kona-ba dezenvolvimentu iha Munisípiu Lautém nian, ne’ebé hala’o iha Salaun Administrasaun Autoridade Munisipál Lautém.

Iha intervensaun, Sua.Eselénsia, Prezidente Autoridade Munisipál Lautém, 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬, 𝐒𝐇, hateten, atividade Konsultasaun Sidadania tuir planu no programa ne’ebé husi Ministériu Finansas tuir kalendáriu iha. Konsultasaun Sidadania ida ne’e bazeia ba Lei No. 2/2022 10 Fevereiru kona-ba enkuadramentu Orsamentu Jerál Estadu no jestaun finanseiru públiku, tanba ida ne’e mai iha fatin ida ne’e atu oinsá halo planu no programa ba iha ita-nia OJE 2026 nian, tanba ida ne’e Prezidente Autoridade Munisipál Lautém konvida Administrador Postu, Xefe Suku, Korpu Relijioza, Partidu Polítiku, Sosiedade SIvil no inklui entidade sira seluk atu mai partisipa enkontru Konsultasaun Sidadania hodi tau hanoin no problema ne’ebé sai prinsípiu fundamentál ne’ebé komunidade sira hasoru iha iha terenu, iha ne’ebé atu halo diskusaun hodi halo preparasaun elaborasaun ba Planu Asaun Annual (PAA).

Aleinde iha fatin ne’ebé hanesan 𝐕𝐢𝐬𝐞-𝐌𝐢𝐧𝐢𝐬𝐭𝐫𝐮 𝐀𝐝𝐦𝐢𝐧𝐢𝐬𝐭𝐫𝐚𝐬𝐚𝐮𝐧 𝐄𝐬𝐭𝐚𝐭𝐚𝐥 (𝐕-𝐌𝐀𝐄), 𝐒𝐫. 𝐉𝐚𝐜𝐢𝐧𝐭𝐨 𝐑𝐢𝐠𝐨𝐛𝐞𝐫𝐭𝐨 𝐆𝐨𝐦𝐞𝐬 𝐝𝐞 𝐃𝐞𝐮𝐬, hatutan loron ida ne’e importante tebes ba Munisípiu Lautém liga liu ba Konsultasaun Sidadania hodi define prioridade ne’ebé komunidade sira presiza sai nu’udar sira nia preokupasaun hodi tau iha Planu Asaun Annual.

Nune’e mós Governante ne’e agradese ba partisipante sira nia prezensa no disponibilidade atu mai tuir hodi kompartilla no kontribui ba hanoin no esperiénsia ruma hodi nune’e planu sei di’ak no sei fó benefísiu ba komunidade sira iha Munisípiu Lautém.

Vise-MAE salienta, Planu estratéjiku dezenvolvimentu nasionál hatuur ona iha enkuadramentu polítika ba planu, estratéjiku desentralizasaun no podér lokál, ne’ebé prevee ona introdusaun iha nivel governasaun Munisipál no estabelese polítika desentralizasaun Administrativa ho objetivu fundamentál, prestasaun servisu públiku ne’ebé efetivu, aumenta partisipasaun sívika no promove instituisaun estadu ne’ebé forte dezenvolve setór privadu iha área rurais sira.

Tanba ida ne’e, Nonu Governu Konstituisional ne’ebé lidera husi Primeiro Ministro (PM-RDTL) Kay Rala Xanana Gusmão, hatuur ona iha Nonu Governu ninia polítika no programa prioridade, ne’ebé liga ba MAE ho ninia Munisípiu sira ninia prioridade mak atu aselera preparasaun ba desentralizasaun podér lokál.

Nia esplika, liu husi programa no Planu Asaun Annual mak bele rezolve problema sira hanesan iha kada setór, hanesan Setor Saúde, Edukasaun, Agrikultura, Estrada, Ponte Eletrisidade, Bee Moos no setór sira seluk, setór sira ne’e maka sai prioridade prinsipál ba nesesidade báziku ba komunidade sira.

𝙍𝙚𝙢𝙖𝙩𝙖

(𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢)