𝐋𝐨𝐬𝐩𝐚𝐥𝐨𝐬, 𝐓𝐞𝐫𝐬𝐚-𝐟𝐞𝐢𝐫𝐚, 𝟏𝟓 𝐀𝐛𝐫𝐢𝐥 𝟐𝟎𝟐𝟓

Provedór Direitus Humanus no Justisa (PDHJ) 𝐒𝐫. 𝐕𝐢𝐫𝐠𝐢𝐥𝐢𝐨 𝐝𝐚 𝐒𝐢𝐥𝐯𝐚 𝐆𝐮𝐭𝐞𝐫𝐫𝐞𝐬 ho nia ekipa hala’o enkontru ho Prezidente Autoridade Munisipál Lautém interinu ne’ebé akompaña ho Diretor/a Servisu Munisipál no Diretor/a Delegasaun Teritorial sira iha Munisípiu Lautém, enkontru ne’e hala’o iha sala VIP Administrasaun Autoridade Munisipál Lautém.

Objetivu prinsipál ba enkontru ida ne’e, parte PDHJ hodi kria komunikasaun no koordenasaun servisu ne’ebé di’ak ho Autoridade Munisipál Lautém, tanba Providór iha Planu atu rekruta funsionáriu na’in rua mai iha Munisípiu Lautém hodi hakbesik servisu ba Komunidade sira.

Iha intervista, Sua.Eselénsia, Prezidente Autoridade Munisipál Lautém interinu, 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬 hateten, Provedór Direitus Humanus no Justisa (PDHJ) mai iha Administrasaun Autoridade Munisipál Lautém hodi hala’o enkontru ho Autoridade Munisipál Lautém, hodi ko’alia relasiona ho atividade PDHJ nian bazeia ba konstituisaun artigu 27 nune’e mós ko’alia kona-ba keixa ruma ne’ebé entidade sira iha Munisípiu Lautém hato’o ba PDHJ.

Iha fatin ne’ebé hanesan, Providór Direitus Humanus no Justisa (PDHJ) 𝐒𝐫. 𝐕𝐢𝐫𝐠𝐢𝐥𝐢𝐨 𝐝𝐚 𝐒𝐢𝐥𝐯𝐚 𝐆𝐮𝐭𝐞𝐫𝐫𝐞𝐬, hatutan, PDHJ hala’o enkontru hodi fahe informasaun ba Autoridade Munisipál Lautém kona-ba kompeténsia PDHJ nian no servisu sira ne’ebé iha.

Durante iha enkontru Providór mós fahe informasaun kona-ba lamentasaun husi komunidade sira ba PDHJ relasiona ho Autoridade Munisipál nian, hanesan Servisu Saude, Edukasaun, Infraestrutura inklui Servisu Komunikasaun nian.

Tanba ne’e, Providor mós espresa intensaun no Planu PDHJ atu estabelese fokal poin na’in rua iha Munisípiu Lautém, tanba bainhira PDHJ iha ona komunikasaun ho Autoridade Munisipál Lautém, másimu iha fulan Junu 2025 PDHJ hala’o ona prosesu rekrutamentu.

Prezensa Pontu Vokal PDHJ iha Munisípiu Lautém, atu fó apoiu ba Delegasaun Teritorial sira ne’ebé eziste ona, hodi simu keixa fahe informasaun ba komunidade sira, ne’ebé sei hala’o servisu hanesan, Monitorizasaun, Fiskalizasaun no Investigasaun liuliu rekolla informasaun sira ne’ebé iha relasaun servisu PDHJ nian.

Nune’e mós Autoridade Munisipál Lautém hato’o preokupasaun balun relasiona ho aplikasaun Lei Komunikasaun nian, tanba bainhira Jornalista fó sai informasaun tenke iha faktus no evidénsia, tanba tuir Autoridade Munisipiu Lautém nia haree Jornalista ne’ebé publika informasaun atividade Autoridade Munisipál Lautém nian ne’ebé viral loos iha Sosial Media la halo konfirmasaun ba Autoridade Munisipál Lautém antes fó sai informasaun.

𝙍𝙚𝙢𝙖𝙩𝙖

(𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢)