𝗟𝘂𝗿𝗼, 𝗞𝗶𝗻𝘁𝗮-𝗳𝗲𝗶𝗿𝗮, 𝟭𝟴 𝗦𝗲𝘁𝗲𝗺𝗯𝗿𝘂 𝟮𝟬𝟮𝟱

Autoridade Munisipál Lautém liu husi ekipa tékniku Elaborasaun ne’ebé lideradu husi Sekretáriu Munisipál Planeamentu Investimentu no Dezenvolvimentu Integradu ho Diretor/a Servisu Munisipál no Diretor/a Servisu Delegasaun Teritorial sira, kontinua hala’o Konsultasaun Públiku ba Planu Estratejiku Munisípiu Lautém tinan 2025-2030 ba Komunidade sira iha Postu Administrativu Luro, ne’ebé hala’o iha Salaun Parókia Nosaa Senhora Rainha Dos Apostolos Luro, Postu Administrativu Lautém, Munisípiu Luatém.

Objetivu husi Konsultasaun ne’e, oinsá Autoridade Munisipál Lautém bele rona hanoin no ideia hotu husi sosiedade no Komunidade sira, atu nune’e ekipa elaborador sira no Prezidente Autoridade Munisipál Lautém bele rejistu no konsidera prioridade bele tau iha Planu Munisípiu nian antes hetan elaborasaun finál ba dokumentus ofisiál ba PDIM nian, tanba planu ne’e Autoridade Munisípiu trasa ba iha tinan 5 nia laran.

Iha intervensaun, reprezentante Prezidente Autoridade Munisipál Lautém, Sekretáriu Munisipál Planeamentu Investimentu no Dezenvolvimentu Integradu, 𝗦𝗿. 𝗧𝗶𝗯𝘂𝗿𝘀𝗶𝗼 𝗱𝗼𝘀 𝗦𝗮𝗻𝘁𝗼𝘀, hateten, Autoridade Munisípiu Lautém kontinua hala’o Konsultasaun Públiku ba Planu Estratejiku Munisípiu Lautém tinan 2025-2030 ba Komunidade sira, iha Konsultasaun Publiku ida ne’e sei ko’alia iha área barak ne’ebé komunidade enfrenta iha terenu, iha Konsultasaun Publiku ida ne’e mós sesaun diskusaun ba partisipante sira, atu nune’e bele hato’o sujestaun no preokupasaun. Nune’e ekipa ne’e lideradu husi Sekretáriu Munisipál Planeamentu Investimentu no Dezenvolvimentu Integradu hamutuk ho Diretor Servisu Munisipál Ajensia Planeamentu, Diretor/a no Diretor/a Delegasaun Teritorial sira, oinsá atu elabora Planu Estratejiku Dezenvolvimentu Munisípiu Lautém nian iha futuru, tanba Planu Estratejiku Dezenvolvimentu Munisípu ne’e mai husi Planu Dezenvolvimentu Nasionál.

Hafoin abertura husi, reprezentante Prezidente Autoridade Munisipál Lautém, Diretor Servisu Ajensia Planeamentu aprezenta uluk Master Plan ba komunidade sira no aprezenta mós kapítulu ba introdusaun hanesan Planu Estratéjiku Dezenvolvimentu Nasionál 2011-2030, Planu Estratejiku dezenvolvimentu Munisipal 2015-2019.

Nune’e mós Asesor PARTISIPA aprezenta kona-ba Dezenvolvimentu Sosial; ho Sub Pilar hanesan Sub Pilar Edukasaun, Sub Pilar Juventude no Desportu, Sub Pilar Saude, Sub Pilar Inkluzaun sosiál no igualdade jéneru, Sub Pilar Ambiente no Sub Pilar Kultura no Eransa.

Asesór PARTISIPA kontinua aprezenta Pilar IV kona-ba Enkuadramentu Instituisionál, hanesan Sub Pilar Padraun Instituisional Governu Lokál, Sub Pilar Jestaun Rekursus Humanu Governu Lokal no Sub Pilar Sistema no Prosedimentu Administrativus Governu Lokal.

Aleinde ne’e mós Diretór Ajensia Planeamentu, aprezenta mós Pilar II kona-ba Dezenvolvimentu Infra-Estrutura Bzáiku; Hanesan Sub Pilar Estrada, Pontes no Kontrolu de Xeias, Pilar Bee Mos no Saneamentu, Pilar de Eletrisidade, Pilar Transporte Terrestre no Pilar Telkomunikasaun.

Sekretáriu Munisipal PIDI aprezenta Pilar III kona-ba Dezenvolvimentu Ekonómia; Sub Pilar Dezenvolvimentu Rural, Sub Pilar Dezenvolvimentu Agrikultura, Peska, Pekuaria no Floresta, Sub Pilar Turismu, Sub Pilar Rekursu Renovavel (Komersiu no Industria), Sub Pilar Investimentu Setor Privadu no Sub Pilar Setor Kooperativa.

Iha biban ne’e Autoridade Munisipál Lautém aproveita Konsultasaun Planu Estratejiku Dezenvolvimentu Munisipiu Lautém iha Postu Administrativu Luro, fahe Fos 25Kg no Supermie apoiu Umanitaria ba Suku 6 iha Postu Luro, enkuantu kada Suku rejistu benefisiáriu hamutuk 14 ne’ebé identifika husi Xefe Suku sira. Apoiu sira ne’e, Autoridade Munisípiu Lautém halo proposta ba iha Autoridade Protesaun Sivil (APC) hodi oferese Fos 25Kg hamutuk 500 saka mai iha Munisípiu Lautém hodi fahe ba Komunidade Vulneravel sira ne’ebé identifika husi Xefe Suku sira.

𝙍𝙚𝙢𝙖𝙩𝙖

(𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢)