𝗟𝗼𝘀𝗽𝗮𝗹𝗼𝘀, 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮, 𝟲 𝗢𝘂𝘁𝗼𝗯𝗿𝘂 𝟮𝟬𝟮𝟱

Autoridade Munisípiu Lautém, kada fulan ba Semana dahuluk nafatin hala’o Serimónia Içar Bandeira Nasionál ho objetivu atu fó Hondra no Gloria ba Heroi Mártires sira, nune’e mós atu relembra nafatin memória rezisténsia nian, Serimónia Içar Bandeira Nasionál ne’e responsavel husi Postu Administrativu Lospalos, Delegasaun Teritorial SEFOPE no Sekretariadu Tékniku Administrasaun Eleitorál (STAE) Munisípiu Lautém, ne’ebé hala’o iha resintu Administrasaun Autoridade Munisípiu Lautém.

iha Intervensaun, reprezentante Prezidente Autoridade Munisipál Lautém, Sekretáriu Munisipál Assuntu Sosiais no Organizasaun Komunitária 𝗦𝗿. 𝗭𝗲𝗳𝗲𝗿𝗶𝗻𝗼 𝗱𝗼𝘀 𝗦𝗮𝗻𝘁𝗼𝘀 𝗦𝗲𝗾𝘂𝗲𝗶𝗿𝗮, husu ba funsionáriu sira bainhira iha formatura ba serimónia Içar Bandeira Nasional tenke hamriik metin ho konsentrasaun, labele la’o tun sa’e, hateke ba malu, nune’e mós labele lori sasán hanesan pasta no sasán sira seluk lori ba iha formatura laran.

Aleinde ne’e mós reprezentante Prezidente Autoridade Munisípiu Lautém, hateten, dadaun ne’e iha fin ba trimestre ikus husi tinan ida ne’e nian, normalmente trimestre ikus, ita sei finaliza servisu ba tinan ida nian, liuliu Servisu Munisipál sira ne’ebé ezekuta hela Orsamentu Jeral Estadu, tanba agora tama ona fulan Outobru, Novembru dala barak ita halo ona relatóriu finál ba ita-nia atividade.

Remata

Média PAM-Lautém