𝐋𝐨𝐬𝐩𝐚𝐥𝐨𝐬, 𝐊𝐮𝐚𝐫𝐭𝐚-𝐟𝐞𝐢𝐫𝐚, 𝟏𝟖 𝐌𝐚𝐫𝐬𝐮 𝟐𝟎𝟐𝟔

𝐒𝐮𝐚 𝐄𝐱𝐞𝐥𝐞𝐧𝐬𝐢𝐚, Prezidente Autoridade Munisipál Lautém hamutuk ho reprezentante Xefe Estadu Maior Jenerál F-FDTL, Tenente Coronel Laurentino Gusmão “Mau Ular” ofisialmente inaugura no entrega uma Esperansa ba Inan faluk Maria Rosa, ne’ebé hetan apoiu husi Ministeriu Defesa (MD) konstrui liu husi Falintil-Forsa Defesa Timor-Leste (F-FDTL) iha Aldeia Kuluhun, Suku Fuiloro, Postu Administrativu Lospalos, Munisípiu Lautém.

Iha intervensaun, Sua Exelénsia, Prezidente Autoridade Munisipál Lautém Sr. Mélio de Jesus SH hato’o agradese no obrigado wain ba Ministru Defesa no Chefe Estadu Maior Jenerál Falintil-Forsa Defesa Timor-Leste (F-FDTL) Tenente Jenerál Falur Rate Laek, ne’ebé mai ho programa ida hodi apoiu povu hodi konstrui uma ba Ema vulneravel tebes, iha ámbitu kompleta tinan 50 ba ezisténsia FALINTIL nian.

Prezidente Autoridade husu ba Miniaterio Defeza atu lori Uma ho tipu hanesan Forca sira halo hodi sai referénsia ba Governu sentrál, nune’e futuru bele utiliza Forsa Armada, tanba Falintil la’os iha tempu funu nian de’it, maibé iha tempu ukun an Falintil mós bele hala’o knaar atu moris hamutuk ho komunidade sira iha aspetu dezenvolvimentu báziku.

Lider másimu iha Munisípiu Lautém salienta ba oin, Autoridade Munisípiu Lautém nafatin presiza komandu F-FDTL liu husi Ministériu Defesa (MD) atu servisu hamutuk ho Ministériu Administrasaun Estatal (MAE) ba programa ne’ebé liga ba kapitál dezenvolvimentu, hanesan atende situasaun emerjénsia ruma hanesan Ponte Kotu, Estrada kondisaun ladi’ak no infraestrutura báziku sira seluk Forsa Armada bele konstrui, atu bele serví no lori moris di’ak ba povu iha futuru.

Iha fatin hanesan, reprezentante Xefe Estadu Maior Jenerál F-FDTL, Tenente Koronel Laurentino Gusmão “Mau Ular” hatutan mai iha fatin ida ne’e atu inaugura no entrega uma esperansa ba Inan faluk Maria Rosa, konstrusaun uma ida ne’e Planu husi Ministériu Defesa (MD) hamutuk ho F-FDTL iha ámbitu komemorasaun tinan 50 ba ezisténsia Falintil.

Tenente Coronel Laurentino Gusmão “Mau Ular” kompremitidu Forsa Armada nafatin prontu atu apoiu, bainhira Autoridade Munisípiu Lautém presiza atu konstrui projetu uma ho medida natoon, enjeñaria F-FDTL prontu apoiu, tanba iha tempu funu moto FALINTIL nian mak “Forsa Mak Ikan no Povu Mak Bee”.

Entretantu konstrusaun Uma refere konstrui husi Komapañia Enzenaria FALINTIL-Forsa Defeza Timor-Leste (F-FDTL), no medida uma 10 X 9 kompostu kuartu 3, sala han, sala simu bainaka ida, hariis fatin ida, sentina ida no dapur ida, uma refere ho nia kustu Orsamentu hamutuk 15.000 dolares Amerika, maibé projetu uma ida ne’e utiliza de’it totál orsamentu hamutuk $14,893, restante ba orsamentu hamutuk $107, no uma refere hala’o lansamentu iha loron 1 Agostu 2025 no inaugura iha loron 18 Marsu 2026.

Média PAM-Lautém