𝐕𝐚𝐧𝐢𝐫𝐢𝐚, 𝐒𝐞𝐱𝐭𝐚-𝐟𝐞𝐢𝐫𝐚, 𝟏𝟕 𝐀𝐛𝐫𝐢𝐥 𝟐𝟎𝟐𝟔

𝐒𝐮𝐚.𝐄𝐬𝐞𝐥é𝐧𝐬𝐢𝐚, Prezidente Autoridade Munisipál Lautém, akompania ho Sekretáriu Munisipál Planeamentu Investimentu no Dezenvolvimentu Integradu (PIDI) reprezentante Administrador Postu Lautém, Xefe Suku Euquise no komunidade sira ofisialmente hala’o inaugurasaun no Asina Plaka ba Konstrusaun Sistema Abastamentu Bee Moos iha Gerisi, Aldeia Vaniria, Suku Euquise, Postu Lautém, Munisípiu Lautém.

Projetu Sistema Bee Moos implementa iha Aldeia Vaniria no Borubatu, tanba komunidade sira iha Aldeia Vaniria no Borubatu halerik tebes ba Bee Moos durante tinan barak nia laran, bainhira komunidade sira atu asesu Bee Moos obriga tenke la’o dok ho distansia kuaze Km 2 ho balun hafoin asesu Bee Moos hodi konsumu, ho preokupasaun hirak ne’e, Autoridade Komunitária Suku Euqise servisu hamutuk ho Autoridade Postu no Autoridade Munisipál liu husi Programa Planu Dezenvolvimentu Integradu Munisipal PDIM) tinan 2025 nian, liu husi projetu ne’ebe Governu Lokál fo konfiansa ba kompana Novebri Unip.Lda hodi kanaliza Sistema Bee Moos ba komunidade sira hamutuk uma kain 114 no populasaun hamutuk 920 hodi bele asesu Bee Moos.

Iha intervensaun, 𝐒𝐮𝐚.𝐄𝐬𝐞𝐥é𝐧𝐬𝐢𝐚, Prezidente Autoridade Munisipál Lautém, 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬 𝐒𝐇 sente orgullu no agradese ba komunidade sira iha Aldeia Vaniria no Borubatu, ne’ebe nafatin hatudu komitmentu pasiensia no koopera tebes ho kompana ne’ebe hala’o implementasaun projetu Sistema Bee Moos iha Aldeia Vaniria no Borubatu nian, tanba durante kompana hala’o projetu komunidade laiha intensaun atu halo intervensaun no impedimentu ruma, ikus kompana finaliza ninia obra Sistema Bee Moos.

Tanba ida ne’e Prezidente Autoridade Munisipál Lautém husu ba benefisiária sira kuidadu nafatin obra ne’ebé estadu liu husi Kompañia konstrui Sistema Bee Moos, nune’e obra Bee Moos ida ne’e bele kontinua dura ho tempu naruk, atu nune’e komunidade sira bele asesu nafatin hodi fasilita nesesidade lorloron nian.

Lider masimu iha Munisípiu Lautém afirma tan katak, iha tinan 2027, Governu lokál liu husi Planu Dezenvolvimentu Integradu Munisipál, iha ona lista projetu hamutuk 46 ne’ebe mai husi Aldeia, Suku, Postu no Munisipiu ne’ebé sei fó prioridade ba Setór Agrikultura liuliu Irigiasaun natar nian ba iha Postu Administrativu 6 iha Munisípiu Lautém, hanesan Suku Euquise foku liu ba Irigasaun Laume, Serelau, Maina I, Postu Luro no Postu Iliomar, projetu hirak ne’e sei aprezenta iha Komisaun Revizaun Orsamentu (KRO), liu husi diskusaun hafoin deside.

Tanba ne’e durante mandatu Governu lokál hamutuk ho Governu sentral tau prioridade ba setór Agrikultura, tanba Munisípiu Lautém iha potensialidade importante mak setór Agrikultura no Turismu, iha setor Agrikultura liuliu Irigasaun ne’ebe daudaun ne’e komunidade sira sei utiliza hela ho tradisionál hodi kanaliza Bee ba natar sira, maibe liu husi planu Governu lokal hamutuk ho Governu sentral sei foka uluk ba Setór Agrikultura liuliu Irigasasaun modernu, atu nune’e komunidade sira bele utiliza natar hodi hasa’e produsaun alimentar.

Aleinde ne’e responsavel Munisípiu Lautem mos akresenta liu tan kona-ba programa merenda escolar, ne’ebé tinan 2026 Governu sentral aloka orsamentu ho valor bot hamutuk Miliaun $1.6, tanba ida ne’e husu ba joven foin sa’e sira tenke iha kreatividade hamutuk ho komunidade sira halo toos no natar hodi hasa’e produsaun produtu lokál sira, tanba programa merenda escolar utiliza produtu lokal 75%, nune’e osan sira ne’e sirkula nafatin iha Aldeia, Suku, Postu no Munisípiu.

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢