𝐋𝐞𝐮𝐫𝐨, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟐𝟕 𝐀𝐛𝐫𝐢𝐥 𝟐𝟎𝟐𝟔

Reprezentante Prezidente Autoridade Munisipál Lautém, Sekretáriu Munisipál Planeamentu Investimentu Dezenvolvimentu no Integradu (PIDI), reprezentante Ministériu Juventude Desportu Arte no Kultura, Komandante Polísia Nasionál Timor-Leste (PNTL) Munisípiu Lautém, Administrador Postu Lospalos no Lider Komunitária sira hala’o abertura ba jogu desportu komunitária hodi komemora loron Restaurasaun Independensia 20 de Maiu 2026, jogu refere hala’o iha Kampu Futsal Leuro.

Lideransa Komunitária husi Suku tolu kompostu husi Suku Leuro, Cacavei no Souro ne’ebé iha inisiativa hodi kria Komisaun Organizadora (KO), atu organiza Desportu Komunitaria, hodi Komemora loron Restaurasaun Independensia 20 de Maiu 2026 nian, desportu komunitária ida ne’e fas parte ba animasaun komunidade joven foin sa’e sira sente haksolok no kontente hodi partisipa, desportu komunitária ida ne’e hetan apoiu husi Ministeriu Juventude Desportu Arte no Kultura (MJDAK).

Iha intervensaun, reprezentante Prezidente Autoridade Munisipál Lautém, Sekretáriu Munisipál Planeamentu Investimentu Dezenvolvimentu no Integradu (PIDI) 𝐒𝐫. 𝐓𝐢𝐛𝐮𝐫𝐬𝐢𝐨 𝐝𝐨𝐬 𝐒𝐚𝐧𝐭𝐨𝐬 hato’o agradese tebes ba Lideransa Komunitária husi Suku tolu ne’ebé iha inisiativa hodi kria Komisaun Organizadora atu halo planu ba atividade desportu komunitária ida ne’e hodi komemora loron Restaurasaun Independensia ba tinan ida ne’e.

Tanba ida ne’e reprezentante Prezidente Autoridade Munisipál Lautém husu ba jogadór sira, hatudu nafatin disiplina jogu desportu nian, jogu sira hanesan ne’e labele hanoin de’it mak manán, maibé jogu iha lakon no iha manán.

Nia mós dehan, Autoridade Munisipál Lautém hamutuk ho Autoridade Postu, lideransa Komunitária la konkorda jogadór sira atu kria fali konflitu iha jogu ida ne’e, tanba eventu sira hanesan ne’e hanesan animasaun ida ba komunidade sira hodi komemora loron Restaurasaun Independensia.

Enkuantu ba jogu desportu komunitária ida ne’e Komisaun Organizadora simu Glubu Feto hamutuk 6 no Glubu Mane hamutuk, Glubu sira ne’ebé envolve iha jogu mak FC. Konsellu Suku Mane, Fc. Leukuru Mane, Fc. Cacavei Mane, Fc. O’ot Mane, Fc. Puma, Fc. Mairete Feto, Fc. Lefe O’ot Feto, Fc. Leukuru Feto, Fc. Cacavei feto Fc. Konsellu Suku feto, Fc. Marathon, Fc. Dada Tali, Fc. Jogo Hana Kalik, Fc. Centro, Fc Marima, Fc. Kakal Lalir, Fc. Leuruku, Fc. Rqncabian, Fc. Garuda, Fc. Horupen 83, Fc. Nairete, Fc. Lefe O’ot B, Fc. Leuro, Fc. Luturula, Fc. L.L Boys, Fc. Lefe O’ot A.

Entretantu tema jerál ba komemorasaun loron nasionál ne’e mak “Juntos Construiremos uma Pátria Cada Vez Mais Justa, Inclusiva e Resiliente”, ne’ebé hetan ona aprovasaun husi reuniaun Konsellu Ministru iha loron 15 Abril 2026 liu ba iha Palasiu Governu.

Média PAM-Lautém