𝐃𝐢𝐥𝐢, 𝐒𝐞𝐱𝐭𝐚-𝐟𝐞𝐢𝐫𝐚, 𝟐𝟒 𝐀𝐛𝐫𝐢𝐥 𝟐𝟎𝟐𝟔

𝐒.𝐄. Prezidente Autoridade Munisipál Lautém 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬 𝐒𝐇 ofisialmente entrega ona dokumentus kona-ba Akademia Militar Conjunta (AMC) ne’ebé simu direta husi Diretor Interinu Instituto Defesa Nasionál (IDN), Dr. Nuno Corvelho Sarmento iha sala enkontru Gabinete IDN nian iha Palácio do Governu.

Dokumentus hirak ne’e durante kandidatu Akademia Militar sira submete mai iha Autoridade Munisipál Lautém liu husi Gabinete Prezidente Autoridade Munisipál Lautém nian.

Iha biban ne’e, 𝐒𝐮𝐚.𝐄𝐬𝐞𝐥é𝐧𝐬𝐢𝐚 Prezidente Autoridade Munisipál Lautém 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬 𝐒𝐇 fó apresiasaun tebes ba programa Nonu Governu Konstitusionál liu husi Ministériu Defeza ne’ebé loke konkursu Akademia Militar Konjunta (AMC) ba tinan 2026, tanba programa ida ne’e fó oportunidade ba foin sa’e sira.

Prosesu konkursu ba Akademia Militar Konjunta (AMC) ida ne’e la’ós de’it loke iha Munisípiu Lautém, maibé loke ba territóriu Timor laran tomak iha kada Autoridade Munisipál sira hodi fó oportunidade ba joven foin sa’e sira ne’ebé iha mentalidade forte, disiplina, no kapasidade ne’ebé di’ak atu asumi ho responsabilidade atu sai FALINTIL Forsa Defesa Nasional Timor-Leste (F-FDTL) hanesan lutu ba nasaun.

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢