𝐋𝐨𝐬𝐩𝐚𝐥𝐨𝐬, 𝐊𝐢𝐧𝐭𝐚-𝐟𝐞𝐢𝐫𝐚, 𝟐𝟎 𝐀𝐠𝐨𝐬𝐭𝐮 𝟐𝟎𝟐𝟔

Autoridade Munisípiu Lautém hala’o atividade sosializasaun no fahe informasaun kona-ba lansamentu ka hatuur fatuk dahuluk ba konstrusaun foun Merkadu Munisipál Lautém, ba vendedor no negosiante sira ne’ebé durante ne’e hala’o atividade komersiál iha merkadu munisipál.

Atividade sosializasaun ne’e partisipa hosi reprezentante Prezidente Autoridade Munisípiu Lautém, Sekretáriu Munisipál Planeamentu, Investimentu no Dezenvolvimentu Integradu (PIDI) 𝐒𝐫. 𝐓𝐢𝐛𝐮𝐫𝐬𝐢𝐨 𝐝𝐨𝐬 𝐒𝐚𝐧𝐭𝐨𝐬, akompana hosi Diretór Servisu Munisipál Jestaun Merkadu no Turizmu, Diretór Servisu Munisipál Bee no Saneamentu, Diretora Delegasaun Territoriais Terras no Propriedade, Administradór Postu Administrativu Lospalos, no ekipa BTL Munisípiu Lautém.

Iha intervensaun, reprezentante Prezidente Autoridade Munisípiu Lautém, Sekretáriu Munisipál PIDI, 𝐒𝐫. 𝐓𝐢𝐛𝐮𝐫𝐬𝐢𝐨 𝐝𝐨𝐬 𝐒𝐚𝐧𝐭𝐨𝐬, hateten katak atividade sosializasaun ne’e importante atu fó atualizasaun ba vendedor no negosiante sira kona-ba planu lansamentu konstrusaun Merkadu Munisipál foun, ne’ebé sei hala’o iha loron 𝟐𝟖 𝐀𝐠𝐨𝐬𝐭𝐮 𝟐𝟎𝟐𝟔.

Nia mós hato’o agradeseimentu ba Governu Konstitusionál, liu hosi Ministériu Komérsiu no Indústria (MCI), tanba tau iha planu konstrusaun Merkadu Munisipál foun, ho objetivu atu vendedor no negosiante sira bele hala’o atividade komersiál iha fatin ne’ebé seguru, konfortável no dignu.

Reprezentante Prezidente Autoridade Munisípiu Lautém husu ba vendedor no negosiante sira atu koopera ho Governu, liu hosi Autoridade Munisípiu Lautém ne’ebe sei fasilita prosesu mudansa ba 𝙢𝙚𝙧𝙠𝙖𝙙𝙪 𝙥𝙧𝙤𝙫𝙞𝙯ó𝙧𝙞𝙪, ne’ebé sei hahú iha segunda-feira.

Autoridade Munisípiu Lautém, liu hosi Diretór Servisu Munisipál Jestaun Merkadu no Turizmu, prepara ona fatin merkadu provizóriu atu vendedor no negosiante sira bele kontinua hala’o sira-nia atividade faan-sasan durante prosesu konstrusaun merkadu foun.

Fatin merkadu provizóriu ne’e sei iha fasilidade bázika hanesan liña eletrisidade, bee moos no sintina públika, tanba, Diretór Servisu Munisipál Jestaun Merkadu no Turizmu ho ekipa sei halo medida no organiza fatin kada vendedor no negosiante hodi garante utilizasaun fatin ho orden.

Autoridade Munisípiu Lautém mós husu ba vendedor no negosiante sira bainhira ekipa Servisu Munisipál Jestaun Merkadu no Turizmu fó orientasaun kona-ba prosesu mudansa, hasai de’it baraka ka estrutura temporária ne’ebé uza durante ne’e no labele estraga ka halo estragu ba fasilidade públika no patrimóniu Estadu nian.

Iha parte seluk, reprezentante vendedor no negosiante sira iha Merkadu Munisipál Lautém, 𝐒𝐫. 𝐂𝐚𝐦𝐢𝐥𝐢𝐨 𝐅𝐞𝐫𝐞𝐢𝐫𝐚, afirma katak vendedor no negosiante sira prontu atu koopera ho Governu, liu hosi Autoridade Munisípiu Lautém, hodi muda ba fatin merkadu provizóriu hodi kontinua atividade faan-sasan.

Maibé, nia husu mós ba Autoridade kompetente atu asegura kondisaun no fasilidade iha merkadu provizóriu bele permite, nune’e vendedor no negosiante sira uza fatin ne’e ho diak no kontinua atividade komersiál ho dignu.

Atividade sosializasaun ne’e hanesan parte hosi preparasaun Autoridade Munisípiu Lautém hodi asegura prosesu mudansa ba merkadu provizóriu lao ho orden no kolaborasaun diak entre Autoridade, vendedor no negosiante sira, antes hahú konstrusaun Merkadu Munisipál Lautém foun.

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢