DILI, 22 outubru 2021 (TATOLI)— Administradór Postu Administrativu Tutuala, Albino de Araújo, informa, daudaun bee no ai-horis sufisiente atu balada fuik liuliu rusa konsumu iha illa Jaco.  

“Iha fulan outubru ne’e, loloos ita fó ona bee ba rusa sira iha Jaco, maibé tanba foin daudaun udan entaun tanke rua ne’ebé prepara bee sei nakonu”, Administradór postu ne’e hateten, ba jornalista sira iha Pouzada Tutuala, Lautém, sesta ne’e.

Iha fulan kotuk Rotary Youth Leadership Awards (RAYLA) ho parseiru internasionál husu oferese be rusa sira iha illa Jaco, maibé la autoriza tanba bee sei sufisiente.

Nune’e, Autoridade lokál ne’e kompromete kontinua serbisu hamutu ho Ministériu Agrikultura no Peska (MAP) munisipál, Bombeiru munispál no Guarda Floresta sira ne’ebé responde ba parke nasionál Nino Konis Santana atu observa mós bee iha illa Jaco.

 “Kuandu bee iha tanke no haree udan laiha ha’u sei koopera ho parte hotu atu lori oferese bee ba rusa sira atu labele mate hanesan tinan 2019, kuaze 200-resin mak mate,” nia garante.

Iha tinan 2019, Governu liuhosi MAP aloka orsamentu rihun $25 atu fornese bee ba illa Jaco atu rusa sira bele hemu bainhira bai-loron naruk.

Enkuatu, Tuir dadus Diresaun Nasionál Konservasaun Natureza, balada fuik sira ne’ebé moris iha illa ne’e mak hanesan rusa hamutuk 80 to’o 100 no manu-fuik sira no seluk tan.