𝐋𝐨𝐬𝐩𝐚𝐥𝐨𝐬, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟕 𝐉𝐮𝐥𝐥𝐮 𝟐𝟎𝟐𝟓

Prezidente Mornington Peninsula Australia Friends of Lospalos, 𝐂𝐨𝐥𝐥𝐞𝐞𝐧 𝐇𝐚𝐦𝐦𝐨𝐧𝐝, lidera ekipa hala’o sorumutu ho Prezidente Autoridade Munisipál Lautém, hodi ko’alia kona-ba liña koordenasaun servisu nian, oinsá futuru ekipa refere bele fó asisténsia iha área hanesan Edukasaun, Saúde, Bee Mos, Agrikultura no Sosiu Ekonómiku iha Munisípiu Lautém, sorumutu ne’e hala’o iha aula Gabinete Prezidente Autoridade Munisipál Lautém.

Iha intervista, 𝐒𝐮𝐚. 𝐄𝐱𝐞𝐥é𝐧𝐬𝐢𝐚, Prezidente Autoridade Munisipál Lautém, 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬, 𝐒𝐇, agradese ba komunidade sira husi Mornington Peninsula husi Australia nian ne’ebé hahú iha tinan kotuk to’o agora apoiu komunidade sira iha área Bee Mos no sira seluk iha Postu Administrativu Lospalos.

Prezidente Autoridade Munisipál Lautém subliña, durante amiga Mornington Peninsula Australia apoiu ba komunidade sira iha Postu Administrativu Lospalos, Postu Administrativu Iliomar iha Aldeia Larimi no Postu Administrativu Luro ne’ebé alarga ona ba Postu sira.

Tanba ida ne’e, nu’udar Prezidente Autoridade Munisipál Lautém, agradese tebes ba komunidade Mornington Peninsula husi Australia, ne’ebé ninia apoiu tomak hodi minimiza difikuldade komunidade sira iha área rurais, ho nune’e, Prezidente Autoridade Munisipál Lautém sujere ba komunidade Mornington Peninsula nafatin kontinua apoiu ba komunidade sira iha Munisípiu Lautém liuliu iha área rurais, tanba komunidade maioria moris iha rurais sei moris ho difikuldade oioin, ne’ebé Postu Administrativu 6 no kontinua fó asisténsia iha área Edukasaun, Bee Mos, Saúde, Agrikultura no Sosiu Ekonómiku.

Enkuantu, iha Postu Administrativu Lospalos, komunidade Mornington Peninsula hala’o ona sira nia atividade hanesan, dada Bee Mos ba komunidade sira iha Suku Souro Aldeia Omukanu, konstrui Sede Komunitária iha Suku Cacavein, konstrui Kampu Basket Bool iha Irara-Ara nune’e mós ajuda umanidade hahán hanesan sexta bázika ba komunidade sira bainhira mosu inundasaun.

Entretantu, Prezidente Mornington Peninsula Australia Friends of Lospalos, 𝐂𝐨𝐥𝐥𝐞𝐞𝐧 𝐇𝐚𝐦𝐦𝐨𝐧𝐝, hateten, ba oin ekipa Mornington Peninsula Australia Friends of Lospalos, bele kria ona amizade, nune’e ba oin sei komunikasaun nafatin ba Autoridade Munisipál Lautém hodi bele hala’o servisu hamutuk ho responde preokupasaun komunidade sira iha Munisípiu Lautém.

𝙍𝙚𝙢𝙖𝙩𝙖

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢