𝗜𝗹𝗶𝗼𝗺𝗮𝗿, 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮, 𝟮𝟮 𝗦𝗲𝘁𝗲𝗺𝗯𝗿𝘂 𝟮𝟬𝟮𝟱

Autoridade Munisípiu Lautém, liu husi ekipa tékniku elaborador ne’ebé lidera husi Sekretáriu Munisipál Planeamentu Investimentu no Dezenvolvimentu Estratéjiku, ne’ebé reprezenta Prezidente Autoridade Munisipál Lautém, 𝗦𝗿. 𝗧𝗶𝗯𝘂𝗿𝘀𝗶𝗼 𝗱𝗼𝘀 𝗦𝗮𝗻𝘁𝗼𝘀, hamutuk ho Diretor/a Servisu Munisipál no Diretor/a Servisu Delegasaun Teritorial sira, hala’o Konsultasaun Públiku ba Planu Estratejiku Munisípiu Lautém tinan 2025-2030 ba Komunidade sira iha Postu Administrativu Iliomar, ne’ebé hala’o iha Salaun Parókia Nossa Senhora do Rosáriu de Fátima Iliomar, Postu Administrativu Iliomar, Munisípiu Lautém.

Objetivu husi Konsultasaun ne’e, oinsá Autoridade Munisipál Lautém no ekipa tékniku elaborador sira bele rona hanoin no ideia hotu husi sosiedade no Komunidade sira, atu nune’e bele rejistu no konsidera prioridade bele tau iha Planu Munisípiu nian antes hetan elaborasaun finál ba dokumentus ofisiál ba PDIM nian, tanba planu ne’e Autoridade Munisípiu trasa ba iha tinan 5 nia laran.

Iha intervensaun, Sekretáriu Munisipál Planeamentu Investimentu no Dezenvolvimentu Estratéjiku, ne’ebé reprezenta Prezidente Autoridade Munisipál Lautém, 𝗦𝗿. 𝗧𝗶𝗯𝘂𝗿𝘀𝗶𝗼 𝗱𝗼𝘀 𝗦𝗮𝗻𝘁𝗼𝘀, hateten, ohin ita hotu mai konsentra ida Salaun Parokia Iliomar, hodi halo Konsultasaun Públiku ida ne’e hodi ita ko’alia asuntu prosesu dezenvolvimentu Munisípiu to’o mai iha Aldeia nian iha Munisípiu Lautém.

Planu Estratéjiku Dezenvolvimentu Munisipál, hodi rona ideia no hanoin hotu husi Komunidade no sosiedade sira relasiona ho Kapital Sosial no sira seluk ne’ebé ekipa Elaborador sira sei aprezenta, atu nune’e ekipa elaborador no Autoridade Munisípiu bele alista hodi tau iha prioridade ba tau iha tinan 5 nia laran antes ita ezekuta kada anuál iha tinan 5 nia laran.

Tanba ida ne’e maka liu husi Konsultasaun ida ne’e, Autoridade Munisípiu Lautém, mai iha Postu Administrativu Iliomar hodi halo konsultasaun ba planu ida ne’e hodi trasa hodi tau iha planu ba livru mestre ba Planu Estratéjiku Dezenvolvimentu Munisipál.

Tanba ida ne’e reprezentante Prezidente Autoridade Munisipál Lautém, husu ba Inan ba Aman sira, iha Konsultasaun Publiku ida ne’e sei ko’alia iha área barak ne’ebé komunidade enfrenta iha terenu, iha Konsultasaun Publiku ida ne’e mós sesaun diskusaun ba partisipante sira, atu nune’e bele hato’o sujestaun no preokupasaun. Hafoin abertura husi Reprezentante Prezidente Autoridade Munisipál Lautém, Diretor Ajensia Planeamentu aprezenta kedas Elaborasaun ba PLanu Estratejiku Dezenvolvimentu Munisipál PEDIM 2025-2030, Kapitulu Introdusaun, Kultura Organizasaun, Potensia Rekursu Lokál. Pilár Dezenvolvimentu.

Aleinde ne’e mós Asesor PARTISIPA, aprezenta kona-ba Konsultasaun Publiku PEDM 2025-2030, iha ne’ebé aprezenta kona-ba Sub-Pilar Dezenvolvimentu Sosial ba kapítulu Pilar Dezenvolvimentu Sosial, Dezenvolvimentu Infra-Estrutura Baziku, Dezenvolvimentu Ekonomia, Dezenvolvimentu Instituisional.

Iha biban ne’e Autoridade Munisipál Lautém aproveita Konsultasaun Planu Estratejiku Dezenvolvimentu Munisipiu Lautém iha Postu Administrativu Iliomar, fahe Fos 25Kg no Supermie apoiu Umanitaria ba Suku 6 iha Postu Iliomar, enkuantu kada Suku rejistu benefisiáriu hamutuk 14 ne’ebé identifika husi Xefe Suku sira.

Apoiu sira ne’e, Autoridade Munisípiu Lautém halo proposta ba iha Autoridade Protesaun Sivil (APC) hodi oferese Fos 25Kg hamutuk 500 saka mai iha Munisípiu Lautém hodi fahe ba Komunidade Vulneravel sira ne’ebé identifika husi Xefe Suku sira.

𝙍𝙚𝙢𝙖𝙩𝙖 (𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢)