𝗟𝗼𝘀𝗽𝗮𝗹𝗼𝘀, 𝗦𝗲𝘅𝘁𝗮-𝗳𝗲𝗶𝗿𝗮, 𝟳 𝗡𝗼𝘃𝗲𝗺𝗯𝗿𝘂 𝟮𝟬𝟮𝟱

Autoridade Munisípiu Lautém, liu husi Sekretáriu Munisipál Administrasaun no Finansas, 𝗦𝗿. 𝗙𝗿𝗮𝗻𝗰𝗶𝘀𝗰𝗼 𝗱𝗼𝘀 𝗦𝗮𝗻𝘁𝗼𝘀, hamutuk ho 𝗦𝘂𝗮, 𝗘𝘀𝗲𝗹é𝗻𝘀𝗶𝗮, Embaixadór Japaun iha Timor-Leste, 𝗞𝗶𝗺𝘂𝗿𝗮 𝗧𝗲𝘁𝘀𝘂𝘆𝗮 ofisialmente hala’o inaugurasaun ba rehabilitasaun Edifísiu Administrasaun Maternidade no Koridor iha Sentru Saúde Lospalos Vila Munisípiu Lautém, ne’ebé hetan finanseiru husi Povu Japaun liu husi Embaixadór Japaun iha Timor-Leste, implementa husi Fundasaun Asaun ba Mudansa, iha Sentru Saúde Lospalos, Munisípiu Lautém.

Iha intevensaun, reprezentante Prezidente Autoridade Munisipál Lautém, Sekretáriu Munisipál Administrasaun no Finansas 𝗦𝗿. 𝗙𝗿𝗮𝗻𝗰𝗶𝘀𝗰𝗼 𝗱𝗼𝘀 𝗦𝗮𝗻𝘁𝗼𝘀, hateten, Autoridade Munisípiu Lautém hato’o agradese ba Embaixadór Japaun iha Timor-Leste, ne’ebé apoiu hodi rehabilita Edifísiu Sentru Saúde ida ne’e hodi fasilita enfermeiru sira atu hala’o atividade ho seguru.

Enkuantu, Komunidade Japaun liu husi Embaixadór Japaun iha Timor-Leste apoiu iha area Dezenvolvimentu ba projetu Edifísiu no sira seluk hamutuk 14, nune’e husu nafatin atu apoiu iha area sira seluk, tamba nesesidade sei barak presiza apoiu husi parseiru Governu no Ajensia Internasionál sira.

Sentru Saúde ne’e reprezenta pasu siknifikativu ida ba oin hodi hametin apoiu ba Komunidade sira iha área rural iha Munisípiu Lautém ne’ebé presiza liu asisténsia médiku.

Sentru furak ida ne’e sei fornese kuidadu, konfortu, no ambiente seguru ba pasiente sira no Inan isin-rua sira, tamba Sentru Saúde ne’ebé rehabilita ona ne’e inklui Sala Emerjénsia, Sala Partu, Sala Internamentu no Farmasia, ne’ebé fó asesu di’ak liu ba servisu Saúde ba ema hamutuk 27,317.

Entretantu, partisipa Serimónia Inaugurasaun ne’e partisipa másimu husi, reprezentante Prezidente Autoridade Munisipál Lautém liu husi Sekretáriu Munisipál Administrasaun no Finansas, Sua.Eselénsia Embaixadór Japaun iha Timor-Leste, Director Servicos Munisipál Saúde Lautém Em Exercicio Sr. Marshal Esteves, Directora Ezekutivo Action For Change Foundation Timor Leste no Chefe Centro Saúde Lospalos no funsionariu sira.

𝙍𝙚𝙢𝙖𝙩𝙖

(𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢)