𝗟𝗼𝘀𝗽𝗮𝗹𝗼𝘀, 𝗦𝗲𝘅𝘁𝗮-𝗳𝗲𝗶𝗿𝗮, 𝟯𝟭 𝗢𝘂𝘁𝗼𝗯𝗿𝘂 𝟮𝟬𝟮𝟱

Nonu Governu Konstituisionál ne’ebé lideradu husi atual Primeiru Ministru (PM) Kaka-Lafai, 𝗞𝗮𝘆 𝗥𝗮𝗹𝗮 𝗫𝗮𝗻𝗮𝗻𝗮 𝗚𝘂𝘀𝗺ã𝗼 hamutuk ho Ministru Obras Publikas (MOP) akompana ho membru Governu sira, membru Parlamentu Nasionál no Entidade Lautém oan ba loron daruak kontinua ofisialmente hatur fatuk dahuluk ba rehabilitasaun Estrada Nasionál Diresaun Postu Lautém-Lospalos, nune’e mós projetu Abastesimentu Bee Moos iha Munisípiu Lautém nian.

Serimónia Lansamentu ne’e iha mós Ministru Obras Públika (MOP) asina kontratu ho Kompañia Internasionál Chongqing International Construction Corporation” husi nasaun China no Contractor “Beijing Urban Construction Group CO, LTD” husi nasaun China ba Abastesimentu Bee mós nian, ne’ebé iha kontratu ho Kompañia ne’e akompaña ho Veteranu sira iha kada Postu, Lia na’in, Relijiozu, Estudante sira, reprezentante Juventude no Entidade sira hotu, lansamentu ne’e hala’o iha Administrasaun Autoridade Munisípiu Lautém nia oin.

Iha intervensaun, 𝗦𝘂𝗮.𝗘𝘀𝗲𝗹é𝗻𝘀𝗶𝗮, Prezidente Autoridade Munisípiu Lautém, Sr. Mélio de Jesus SH, hateten, ohin ba loron daruak Governu kontinua ofisialmente hala’o lansamentu Estrada Nasionál husi Diresaun Lautém-Lospalos, nune’e mós iha projetu Abastesimentu Bee Moos iha Munisípiu Lautém.

Ho nune’e lori Povu Munisípiu Lautém nia naran tomak hakarak agradesimentu wain tebes no kongratula ba Xefe Governu Konstituisionál Kaka-Lafai, Kay Rala Xanana Gusmão, ne’ebé ho komitmentu boot tebes hodi lidera IX Governu Konstitusionál nia ne’ebé nia komprimísiu atu lori dezenvolvimentu ba Timor-laran tomak espesial iha Munisípiu Lautém.

Ho nune’e, aproveita oportunidade ida ne’e, lori Komunidade tomak iha Munisípiu Lautém nia naran, hakruk husu nafatin ba Kaka-Lafai atual Primeiru Ministru (PM-RDTL) Kay Rala Xanana Gusmão, atu bele iha tinan oin kontinua hala’o lansamentu mós Estrada Nasionál husi Diresaun Lospalos-Iliomar, Lospalos-Lore, Buihomau-Luro no Estrada rural iha kapitál Lospalos.

Prezidente Autoridade Munisípiu Lautém hamutuk ho Povu nafatin fó fiar ba Sua.Eselénsia atual Primeiru Ministru (PM-RDTL) Kaka-Lafai, Kay Rala Xanana Gusmão hamutuk ho Ministru Obras Publikas (MOP) no Ministru Planeamentu Investimentu no Estratéjiku (MPIE) ho membru KAFI tomak sei tau atensaun másimu ba infraestrutura bázika sira iha Munisípiu Lautém.

Enkuantu Estrada Nasionál husi Diresaun Lautém-Lospalos ho Kilometru 27.980, ne’ebé sei rehabilitasaun husi Contractor “Chongqing International Construction Corporation” hui nasaun China ho valor Orsamentu hamutuk $18,836,713.10.

Aleinde ne’e mós iha projetu Abastesimentu Bee Moos iha Munisípiu Lautém, ne’ebé sei responsavel husi Contractor “Beijing Urban Construction Group CO, LTD” husi nasaun China ho Orsamentu hamutuk $17, 012,327.59.

Remata

(Média PAM-Lautém)