𝗖𝗼𝗺, 𝗞𝗶𝗻𝘁𝗮-𝗳𝗲𝗶𝗿𝗮, 𝟯𝟬 𝗢𝘂𝘁𝗼𝗯𝗿𝘂 𝟮𝟬𝟮𝟱

Nonu Governu Konstituisionál ne’ebé lideradu husi atual Primeiru Ministru (PM) 𝗞𝗮𝘆 𝗥𝗮𝗹𝗮 𝗫𝗮𝗻𝗮𝗻𝗮 𝗚𝘂𝘀𝗺ã𝗼, ohin hamutuk ho Ministru Obras Publikas (MOP) akompana ho membru Governu sira, membru Parlamentu Nasional no entidade Lautém oan sira hahu ofisialmente hatur fatuk dahuluk ba rehabilitasaun Estrada nasionál Diresaun Postu Administrativu Lautém-Com, nune’e mós iha lansamentu ne’e, Ministru Obras Públika (MOP) asina kontratu ho Kompañia Internasionál Shaannxi Construction Engineering Grup Corporation Limited, husi nasaun Xina ne’ebé sei responsabliza rehabilitasaun estrada nasionál Lautém-Com, lansamentu ne’e hala’o iha Suku Com, Postu Administrativu Lautém, Munisípiu Lautem.

Iha diskursu, 𝗦𝘂𝗮.𝗘𝘀𝗲𝗹𝗲𝗻𝘀𝗶𝗮, Prezidente Autoridade Munisipiu Lautem 𝗦𝗿. 𝗠é𝗹𝗶𝗼 𝗱𝗲 𝗝𝗲𝘀𝘂𝘀 𝗦𝗛, lori Komunidade Munisípiu Lautém tomak nia naran, hakarak agradesimentu wain tebes ba IX Governu Konstituisionál, espesialmente ba 𝗦𝘂𝗮.𝗘𝘀𝗲𝗹𝗲𝗻𝘀𝗶𝗮, Primeiru Ministru (PM-RDTL) 𝗞𝗮𝘆 𝗥𝗮𝗹𝗮 𝗫𝗮𝗻𝗮𝗻𝗮 𝗚𝘂𝘀𝗺ã𝗼, tamba ho esforsu tomak ohin loron bele realiza reabilitasaun Estrada nasionál ida ne’e iha Munisípiu Lautém, la-haluha mos hatoo ami nia agradesimentu wain ba Ministériu Obras Publikas, Ministériu Planeamentu Integradu Estratejiku no parte relavante sira seluk nia esforsu ba iha prosesu planeamentu no implementasaun projetu ida ne’e.

Ho nune’e loron ohin nu’udar loron importante tebes ba ita hotu hodi halibur iha fatin ida ne’e, atu sai sasin ba iha istoria dezenvolvimentu Munisípiu Lautém nian, maka lansamentu ofisial projetu reabilitasaun Estrada Nasionál, Diresaun Lautém-Com no aban sei lansa mós projetu Estrada Diresaun Nasionál Lautém-Lospalos.

Lider másimu iha Munisípiu Lautém afrima katak, ohin hala’o lansamentu Estrada ne’ebé sei liga direra ba komunidade sira iha Munisípiu Lautém ba futuru ida ne’ebé diak liu ho movimentu ekonómia lokál, ho asesu no oportunidade ba servisu publiku, no sei fó efeitu boot ba vida sosiál, Ekonómiku no Kultura iha Lautém, tamba ne’e, ohin ita la’os deit lansa projetu infraestrutura, maibe lansa mós esperansa komprimisiu ba dezenvolvimentu ida ne’ebe inklusivu, sustentavel no integradu iha Munisípiu Lautém.

Nia dehan, tamba ita hotu hatene durante tinan barak nia laran, komunidade sira iha Munisípiu Lautém enfrenta no difikuldade tebes ba iha setór infraestrutura báziku, partikularmente infraestrutura Estrada, tamba koneksaun Estrada nasionál ba Munisípiu hanesan (Lautém-Lospalos no Lautém-Com) nune’e mós ligasaun Estrada kapital Munisípiu ba Postu Administrativu sira ho kondisaun at tebes, situasaun sira ne’e difikulta tebes movimentu transporte públiku, asesu ba servisu baziku, no difikulta transportasaun produtu Agrikultura ba iha merkadu nasionál.

Ho nune’e, lansamentu projetu reabilitasaun Estrada ne’e nu’udar resposta konkretu ba preokupasaun no ejijensia komunidade sira iha Munisípiu Lautém durante tinan barak nia laran, Aleinde lansamentu mak ohin ita hala’o, ami mós fiar katak sei bele iha tan lansamentu projetu Estrada sira seluk iha tinan ida ne’e ka tinan oin, ne’ebe mak IX Governu Konstituisional planeia tia ona, hanesan Estrada Diresaun Lospalos-Iliomar, Lospalos-Lore, Buihomau-Luro.

Responsavel Munisípiu Lautém mensiona tamba Estrada mak infraestrutura bázika ida ne’ebé importante no sai fator estimulador ida iha prosesu dezenvolvimentu sósiu-ekonómika no infraestrutura Estrada mak sei bele fasilita mobilidade no asesu ba mobilidade ba servisu públiku, estipula ekonómia lokál, aumenta seguransa rodaviaria, fasilita resposta lais ba servisu emerjensia, no suporta planu dezenvolvimentu sira iha setór sira seluk, sei kontribui mós ba implementasaun efetivu polítika desentralizasaun ne’ebé la’o dadauk, tamba bele permite ligasaun efisiente entre komunidade, Autoridade Munisipál no Governu Sentrál.

Tamba ida ne’e, Prezidente Autoridade Munisípiu Lautém esplika, nu’udar Lautém oan, agradese no orgullu boot ba lideransa sira nia matenek no vizaun estratejika husi 𝗦𝘂𝗮.𝗘𝘀𝗲𝗹𝗲𝗻𝘀𝗶𝗮 Primeiru Ministru (PM-RDTL), “𝗞𝗮𝗸𝗮-𝗟𝗮𝗳𝗮𝗶”, 𝗞𝗮𝘆 𝗥𝗮𝗹𝗮 𝗫𝗮𝗻𝗮𝗻𝗮 𝗚𝘂𝘀𝗺ã𝗼, tamba ho esforsu tomak ohin loron bele realiza lansamentu reabilitasaun Estrada Nasionál ida ne’e iha Munisípiu Lautém.

Nia fundamenta liu tan, reabilitasaun estrada ida ne’e sei lori vantajen boot ba komunidade Munisípiu Lautém iha aspeitu ekonómiku, sosiál no mobilidade iha aspeitu ekonomiku, Estrada diak sei fasilita transportasaun produtu Agrikultura, peska no komersiu lokál, no sei estimula investimentu, iha aspeitu sosial, sei aumenta asesu ba Edukasaun, Saúde no servisu publiku sira seluk.

Nune’e aproveita oportunidade ida ne’e, reprezenta komunidade Munisípiu Lautém hakarak parabeniza no hatoo Obrigadu wain ba “𝗞𝗮𝗸𝗮-𝗟𝗮𝗳𝗮𝗶”,, 𝗞𝗮𝘆 𝗥𝗮𝗹𝗮 𝗫𝗮𝗻𝗮𝗻𝗮 𝗚𝘂𝘀𝗺ã𝗼 nia esforsu tomak ne’ebe lahatene kolen, sempre hadomi nia Povu no ohin loron sei kontinua luta ba prospriedade ovu Timor-Leste iha rai laran no mós iha nivel Internasionál.

Nu’udar Lautém oan, fiar no sempre fiar katak, “𝗞𝗮𝘆 𝗥𝗮𝗹𝗮” 𝗞𝗮𝘆 𝗥𝗮𝗹𝗮 𝗫𝗮𝗻𝗮𝗻𝗮 𝗚𝘂𝘀𝗺ã𝗼, sei tau atensaun duni no la-haluha Munisipiu Lautem, tamba rai Lautém no Lautém nia oan sira iha relasaun emosional forte no maun boot iha tempu resistensia nia laran no sei kontinua too ohin loron, ria Lautém sei la ses husi maun boot nia atensaun tamba iha rai Lautém ida ne’e duni mak maun boot hamutuk ho nia maluk komandante sira seluk, hahu reorganiza funu libertasaun no halo mudansa estratéjiku sira hodi sustenta funu naruk ida ne’e.

Iha okaziaun importante ida ne’e, hakarak apelu ba komunidade, juventude, lideransa lokál no organizasaun Komunitaria sira atu kontinua fo apoiu no partisipasaun ativa iha prosesu reabilitasaun Estrada Nasionál.

Projetu ida ne’e la’os prioridade Ministériu ka Autoridade Munisipál nian, maibe ne’e prioridade komunidade Lautém hotu, ita hotu mak sei utiliza Estrada ne’e lor-loron, tamba ne’e responsabilidade ita hotu nian atu proteje, respeita no kolabora iha prosesu implementasaun.

Estrada ne’e sei liga ita hotu ho oportunidade dezenvolvimentu iha tempu oin mai, ho kolaborasaun no unidade, ita bele asegura katak, kreabilitasaun ida ne’e la’os de’it susesu temporariu, maibe investimentu tempu naruk ba jerasaun sira oin mai, Autoridade Munisipál Lautém hato’o konfiasa nafatin ba komunidade Lautém, tamba dezenvolvimentu la’os halo husi Governu de’it, maibe liu husi partisipasaun, unidade no responsabilidade ita hotu nian.

Enkuantu rehabilitasaun Estrada Lautém-Com ho distánsia 19.760, ne’ebé sei rehabilita Empreza Shaannxi Construction Engineering Grup Corporation Limited, husi nasaun Xina, ho total Orsamentu $11.213.813,90, durasaun servisu tinan ida.

Remata

(Media PAM-Lautem)