𝐒𝐨𝐫𝐮, 𝐊𝐢𝐧𝐭𝐚-𝐟𝐞𝐢𝐫𝐚, 𝟓 𝐌𝐚𝐫𝐬𝐮 𝟐𝟎𝟐𝟔

Reprezentante Prezidente Autoridade Munisipál Lautém, Sekretáriu Munisipal Planeamentu Investimentu no Dezenvolvimentu Integradu hamutuk ho Sekretáriu Estadu Kooperativa (SEKoop), realiza Koilleta Bafo Kayrala hamutuk 6 Hektares ba epoka dahuluk iha tinan 2026 nian, ne’ebé produsaun ne’e produs husi Grupu “𝗟𝗮𝗹𝗮𝗺𝘂 𝗟𝗮𝗺𝗮𝗻” ne’ebé lokaliza iha Suku Soru, Postu Administrativu Lospalos, Munisipiu Lautem.

Iha intervensaun, reprezentante Prezidente Autoridade Munisipál Lautém, Sekretáriu Munisipal Planeamentu Investimentu no Dezenvolvimentu Integradu, 𝐒𝐫. 𝐓𝐢𝐛𝐮𝐫𝐬𝐢𝐨 𝐝𝐨𝐬 𝐒𝐚𝐧𝐭𝐨𝐬 hateten, Nonu Governu Konstituisional nia papél mak oinsá atu eleva grupu sira ne’ebé hakarak halo atividade hodi nune’e bele aumenta sira nia ekonomia uma laran, liu husi Sekretariu Estadu Kooperativa hala’o ona atividade Bafo Kayrala, nune’e mós kria grupu no Kooperativa.

Nia dehan Governu anteriór liu husi Sekretariu Estadu Kooperativa mós kria grupu no Koopertativa iha Munisipiu hotu, maibé grupu balun kontinua ho atividade no grupu balun la kontinua, ne’ebé filafali ba kreatividade kada grupu nian.

Tanba ida ne’e reprezentante Prezidente Autoridade Munisipál Lautém husu ba grupu sira bainhira grupu ne’e la’o di’ak nafatin, tenke koopera malu nafatin no rona malu iha grupu laran, atu nune’e bele hasa’e ekonomia uma laran.

Iha fatin hanesan, Sekretáriu Estadu Kooperativa (SEKoop) 𝐒𝐫. 𝐀𝐫𝐬é𝐧𝐢𝐨 𝐏𝐞𝐫𝐞𝐢𝐫𝐚 𝐝𝐚 𝐒𝐢𝐥𝐯𝐚 hatutan, atividade ida ne’e hanesan parte husi programa prioritariu SEKoop nian iha Nonu Governu Konstituisional atu promove no dezenvolve produtu Bafo Kayrala hanesan matéria prima potensiál ba indústria no konsumu lokál, kolleita dahuluk ne’e katak produsaun iha área refere la’o di’ak no iha perspetiva favoravel ba merkadu iha futuru.

Iha intervensaun, SEKoop fó apresiasaun ba produtór no kamponez sira, inklui funsionáriu tékniku sira ne’ebé fó apoiu durante prosesu plantasaun to’o kolleita, tanba Bafo Kayrala iha kapasidade atu kolleita to’o dala tolu iha tinan ida tuir ho kondisaun rai no jestaun agríkola.

Iha okaziaun ne’e SEKoop husu ba produtór sira atu tau atensaun ba kualidade produtu, liuliu iha faze pos-kolleta, atu asegura konfiansa husi kompañia kompradór sira, inklui kompañia Heineken ne’ebé sei sosa produtu ne’e hodi prosesa sai serveja.

Tanba ida ne’e, SEKoop orienta ba Diresaun tékniku sira atu fasilita formasaun ba Grupu “𝗟𝗮𝗹𝗮𝗺𝘂 𝗟𝗮𝗺𝗮𝗻” hodi bele hasa’e kapasidade no jestaun produsaun ne’ebé ho kualidade iha futuru.

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢