𝐋𝐨𝐬𝐩𝐚𝐥𝐨𝐬, 𝐓𝐞𝐫𝐬𝐚-𝐟𝐞𝐢𝐫𝐚, 𝟐𝟒 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Konsellu Nasionál Seguransa no Soberania Alimentar no Nutrisional Timor-Leste (KONSSAN-TL) ne’ebé servisu hamutuk ho Ajensia Internasional WorldFish no University Wollongon Australia partilla peskiza kona-ba Sistema Polítika Ai-Han iha Timor-Leste ne’ebé hili Munisípiu Lautém, Díli no RAEOA mak sai hanesan Munisípiu ne’ebé dahuluk atu implementa peskiza kona-ba Sistema Polítika Ai-Han nian, enkontru ne’e hala’o iha Sala VIP Administrasaun Autoridade Munisipál Lautém.

Iha intervensaun, reprezentante Prezidente Autoridade Munisipál Lautém, Sekretáriu Munisipál Planeamentu Investimentu no Dezenvolvimentu Integradu 𝐒𝐫. 𝐓𝐢𝐛𝐮𝐫𝐬𝐢𝐨 𝐝𝐨𝐬 𝐒𝐚𝐧𝐭𝐨𝐬 hateten, Workshop ida ne’e importante tebes, ne’ebé husu Diretor Servisu Munisipál sira bele partisipa ho másimu atu nune’e iha futuru oinsá halo komunikasaun no koordenasaun di’ak ba iha polítika Sistema Ai-Han iha Timor-Leste espesiál iha Munisípiu Lautém, atu nune’e bele redús malnutrisaun.

Reprezentante Prezidente Autoridade Munisipál Lautém sujere ba Diretor Servisu Munisipál sira hanesan Seguransa Alimentar, Diretor Servisu Munisipál Agrikultura, Diretor Servisu Munisipál Edukasaun, Diretor Servisu Munisipál Saude, oinsá bele haree Ai-Han lokál sira ne’ebé iha nutritivu no kualidade, nune’e bele redús malnutrisaun iha Munisípiu Lautém.

Ho ida ne’e Autoridade Munisipál Lautém agradese ba planu no programa ida ne’e, ne’ebé mak mai iha Munisípiu Lautém, tanba Munisípiu Lautém iha potensialidade tebes ba iha Setór Agrikultura, tanba kada tinan Autoridade nafatin tau prioridade ba iha área agrikultura nian.

Reflesaun ba Rezultadu mak atu reflete no buka konsensu kona-ba rezultadu peskiza no prioridade sira husi Sistema ai-han ne’ebé eziste ona ho CONSSAN-TL no nia parseiru esensiál sira.

Alinamentu Estratejiku mak identifika oportunidade atu aliña no senejia diresaun estratéjiku ne’ebé luan (iha ita-nia polítika ida-idak) atu rezolve dezafiu Sistema ai-han iha timor-leste.

Opsaun Polítika Ko-Dezenvolvimentu atu fornese rekomendasaun sujestaun atu kria polítika opsaun sira Brief ne’ebé aliña besik ho CONSSAN-TL nia misaun atu hasa’e koordenasaun polítika multi-level no parseiru ba Sistema ai-han iha Timor-Leste.

Haforsa Propriedade Instituisional hodi promove sentidu responsabilidade ne’ebé fahe ba Ministériu liña sira, hodi asegura adosaun no implementasaun ho susesu ba opsaun polítika sira tuir mai.

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢