𝐋𝐨𝐬𝐩𝐚𝐥𝐨𝐬, 𝐓𝐞𝐫𝐬𝐚-𝐟𝐞𝐢𝐫𝐚, 𝟐𝟓 𝐀𝐠𝐨𝐬𝐭𝐮 𝟐𝟎𝟐𝟔

Autoridade Munisipál Lautém, liuhusi Diresaun Servisu Munisipál Protesaun Sivil no Jestaun Dezastre Naturais, hala’o desaminasaun kona-ba Protesaun Sivil no Jestaun Dezastre Naturais ba delegadu/a sira iha Suku 8, Postu Administrativu Lospalos.

Atividade ne’e hala’o iha Aula Enkontru Administrasaun Postu Lospalos, ho objetivu atu hasa’e koñesimentu no komprensaun delegadu/a sira kona-ba Protesaun Sivil, Jestaun Dezastre Naturais, no tarefa servisu sira, atu nune’e bainhira akontese dezastre ruma iha komunidade, sira bele fó resposta no atendimentu tuir lei no prosedimentu ne’ebé vigora.

Desaminasaun ne’e mós aborda 𝐃𝐞𝐤𝐫𝐞𝐭𝐮-𝐋𝐞𝐢 𝐍.º 𝟑𝟒/𝟐𝟎𝟐𝟓, 𝟏𝟓 𝐎𝐮𝐭𝐮𝐛𝐫𝐮, ne’ebé altera Dekretu-Lei N.º 84/2023, no 𝐃𝐌 𝐍.º 𝟖𝟓/𝟐𝟎𝟐𝟑, 𝟐𝟗 𝐃𝐞𝐳𝐞𝐦𝐛𝐫𝐮, ne’ebé relevante ba servisu no responsabilidade delegadu/a sira iha nível suku.

Iha sesaun abertura, reprezentante Administrador Postu Administrativu Lospalos, 𝐒𝐫. 𝐀𝐫𝐬𝐞𝐧𝐢𝐨 𝐌𝐚𝐫𝐢𝐚 𝐝𝐚 𝐂𝐨𝐧𝐜𝐞𝐢çã𝐨, hateten katak koñesimentu kona-ba Lei Protesaun Sivil importante ba autoridade lokál, liuliu delegadu/a sira iha aldeia, atu bele hala’o servisu ho responsabilidade no tuir lei.

Nia subliña katak iha situasaun dezastre, prioridade primeiru mak 𝐩𝐫𝐨𝐭𝐞𝐣𝐞 𝐞𝐦𝐚, depois foin proteje sasán. Tanba ne’e, autoridade lokál sira presiza komprende di’ak sira-nia responsabilidade no prosedimentu atu bele fó resposta apropriadu ba komunidade.

Nia mós enfatiza importánsia husi preparasaun iha faze “𝐚𝐧𝐭𝐞𝐬 𝐧𝐨 𝐝𝐞𝐩𝐨𝐢𝐬” dezastre, tanba asaun sira tenke hala’o tuir koridor legal no ho koordenasaun entre autoridade sira. Nia husu partisipante sira atu aproveita oportunidade ne’e atu aprende, diskute no husu bainhira iha asuntu ruma ne’ebé seidauk komprende.

Enkuantu ne’e, Diretor Servisu Munisipál Protesaun Sivil no Jestaun Dezastre Naturais Munisípiu Lautém, 𝐒𝐫. 𝐂𝐚𝐬𝐢𝐦𝐢𝐫𝐨 𝐝𝐚 𝐀𝐬𝐬𝐮𝐧çã𝐨 𝐏𝐢𝐫𝐞𝐬, afirma katak desaminasaun ne’e iha objetivu atu fahe informasaun no haree situasaun iha kada aldeia, atu delegadu/a sira bele hatene no komprende medida ne’ebé presiza foti bainhira dezastre ruma akontese.

Nia hateten katak Protesaun Sivil nu’udar atividade permanente, multidisiplinár no multisektoriál ne’ebé dezenvolve husi Estadu atu prevene risku koletivu no hamenus efeitu husi dezastre no asidente boot sira, ho prioridade ba protesaun vida no seguransa komunidade.

Iha desaminasaun ne’e, partisipante sira mós hala’o diskusaun iha grupu ho tema oioin kona-ba dezastre no risku, inklui 𝐃𝐞𝐳𝐚𝐬𝐭𝐫𝐞 𝐍𝐚𝐭𝐮𝐫𝐚𝐢𝐬, 𝐋𝐚𝐟𝐚𝐞𝐤 𝐓𝐚𝐭𝐚 𝐄𝐦𝐚, 𝐀𝐧𝐢𝐧 𝐒𝐨𝐛𝐮 𝐔𝐦𝐚, 𝐑𝐚𝐢 𝐇𝐚𝐥𝐚𝐢, 𝐈𝐧𝐬𝐞𝐧𝐝𝐢𝐮 𝐀𝐢-𝐡𝐚𝐧 𝐔𝐦𝐚 𝐧𝐨 𝐀𝐢-𝐥𝐚𝐫𝐚𝐧 𝐓𝐮𝐚𝐧.

Atividade ne’e espera bele hasa’e koñesimentu no kapasidade delegadu/a sira iha Suku 8 Postu Administrativu Lospalos, atu sira bele hala’o sira-nia responsabilidade ho di’ak no fó resposta lalais, apropriadu no tuir lei bainhira akontese dezastre iha komunidade.

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢