𝐌𝐮𝐚𝐩𝐢𝐭𝐢𝐧𝐞, 𝐒𝐞𝐱𝐭𝐚-𝐟𝐞𝐢𝐫𝐚, 𝟓 𝐃𝐞𝐳𝐞𝐦𝐛𝐫𝐮 𝟐𝟎𝟐𝟓

Assosiaun Futebol Munisípiu Lautém, hamutuk ho komunidade sira no Veterano/a iha Suku Muapitine realiza Jogu Futebol Sub-20 ba Taxa Rotativa Masakre Muapitine ba dala Epoka datolu III, hodi selebra loron Masakre Muapitine ne’ebé ho tema “𝙋𝙧𝙚𝙥𝙖𝙧𝙖 𝙣𝙤 𝙋𝙧𝙤𝙢𝙤𝙫𝙚 𝙁𝙤𝙞𝙣 𝙨𝙖’𝙚 𝙝𝙤 𝙏𝙖𝙡𝙚𝙣𝙩𝙪 𝙁𝙪𝙩𝙚𝙗𝙤𝙡” ne’ebé hala’o iha Kampu Fotebol Masakre Muapitine Malahara.

Iha intervensaun, reprezentante Prezidente Autoridade Munisípiu Lautém, Sekretáriu Munisipál Administrasaun no Finansas, 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬 agradese ba Komisaun Organizadora liu husi Xefe Suku Muapitine ne’ebé iha komitmentu makas kada tinan Komemora Taça Rotativa Masakre Muapitine nian iha area desportiva.

Reprezentante Prezidente Autoridade Munisipál Lautém husu ba Jogador sira bainira iha Jogu buka bola atu tebe, la’os buka nia maluk sira hodi kria instabilidade, maibe tenke buka bola tebe hodi nune’e bele kria paz no amizade entre jogador sira.

Tamba ida ne’e, enkoraja ba Jogador sira tenke joga tuir nia regra, atu nune’e bele valoriza, dignifika no respeita nafatin Heroi sira liuliu Masakre Muapitine, tamba liu husi sira nia sakrifisu mak ohin loron ita Independente.

Objetivu ba eventu Fotebol ida ne’e ho intensaun atu dignifika no valoriza ita nia heroi sira ne’ebe fakar sira ran ba ida ne’e hetan Independente, nune’e Jogu ida ne’e mos bele hametin kria paz amizade entre Suku ba Suku Postu ba Postu iha Munisípiu Lautém nia laran, nune’e mos promove foin sa’e sira liuliu ho idade 20 mai kraik, atu nune’e futuru bele iha kompete iha nivel Munisipál Nasionál.

Enkuantu ba abertura Jogu Taça Rotativa Masakre Muapitine mak FC Tchauluturu no FC Masakre Muapitine.

Enkuantu Jogador sira ne’ebe atu envolve iha Kompetisaun Jogu Taça Rotativa Masakre Muapitine mak hanesan, FC Vila Sentru, FC Savarika, FC Jaco, FC Villa Paz, FC Luarai, FC Omucano, FC Motolori, FC EL Centro, FC Pairara, FC Be Moris, FC Motara, FC RSS, FC Tonsus, FC Masakre Muapitine, FC Tchauluturu, FC Lere-Loho, FC Sengol, FC Belta Trez, FB Buradu, FC Labers.

Abertura ba Eventu Desportiva Komemorasaun Taça Rotativa ida ne’e partisipa másimu husi Deputadu Albino da Silva, Diretor Jerál ne’ebé reprezenta Ministru Juventude Desportu Arte no Kultura (MJDAK) Xefe Gabinete Prezidente Autoridade Munisipál Lautém, Diretor Servisu Munisipál Patrimoniu no Lojistiku, Xefe Departamentu Apoiu Organizasaun Komunitária, Prezidente Assosiasaun Futebol Munisípiu Lautém, Komandante Eskuadra Posu Lospalos, Família Vitima Masakre Muapitine, Veteranu no Komunidade sira.

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢