𝐋𝐨𝐬𝐩𝐚𝐥𝐨𝐬, 𝐊𝐢𝐧𝐭𝐚-𝐟𝐞𝐢𝐫𝐚, 𝟏𝟒 𝐌𝐚𝐫𝐬𝐮 𝟐𝟎𝟐𝟓

𝐒𝐮𝐚. 𝐄𝐬𝐞𝐥é𝐧𝐬𝐢𝐚, Prezidente Tribunal Rekursu 𝐒𝐫. 𝐃𝐞𝐨𝐥𝐢𝐧𝐝𝐨 𝐝𝐨𝐬 𝐒𝐚𝐧𝐭𝐨𝐬, Diretor Geral akompaña mós enjeñeiru sira hala’o audiénsia ho Prezidente Autoridade Munisipál Lautém, hodi ko’alia kona-ba liña koordenasaun servisu nian, ne’ebé atu harii edifísiu Tribunal Judicial Primeira Instansia iha Munisipiu Lautem hodi hakbesik komunidade sira, audiénsia ne’e hala’o iha Sala Gabinete Prezidente Autoridade Munisipál Lautém.

Durante iha audiénsia, intervensaun husi Prezidente Autoridade Munisipál Lautém, 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬, 𝐒𝐇, hateten, Autoridade Munisipál Lautém apoiu totál ba planu no programa ne’ebé parte Judisiariu liu husi Tribunal Rekursu nian, tanba daudaun ne’e Prokurador Ministériu Públiku iha ona Munisípiu Lautém, maibe durante ne’e komunidade sira atu rezolve problema tenke la’o dook ba Munisípiu Baucau, maibé interesante tebes Prezidente Tribunal Rekursu iha ona planu no programa atu harii edifísiu Tribunal Judicial Primeira Instansia iha Munisípiu Lautém atu nune’e bele hakbesik komunidade sira.

Iha fatin ne’ebé hanesan, 𝐒𝐮𝐚. 𝐄𝐬𝐞𝐥é𝐧𝐬𝐢𝐚, Prezidente Tribunal Rekursu, (PTR) 𝐒𝐫. 𝐃𝐞𝐨𝐥𝐢𝐧𝐝𝐨 𝐝𝐨𝐬 𝐒𝐚𝐧𝐭𝐨𝐬, salienta, mai hala’o audiénsia ho Prezidente Autoridade Munisipál Lautém hodi koordena servisu nian kona-ba atu survei no observa rai no fatin atu harii edifísiu Tribunal Judicial Primeira Instansia iha Munisípiu Lautém, tanba ne’e presiza apoiu husi Prezidente Autoridade Munisipál Lautém ho Estrutura inklui dirijenti Ministeriu sira nian ne’ebé mak servisu iha Munisípiu Lautém, Veterano no Komunidade sira hotu hodi apoiu malu.

Prezidente Tribunal Rekursu ne’e esplika, dezeñu ne’ebé Edifisiu foun Tribunal nian, kuaze dezeñu ne’ebé hanesan iha territóriu Timor laran tomak inklui Munisípiu Lautém nian, nune’e uma ba Juis sira mós dezeñu hanesan.

Tanba planu Prezidente Tribunal Rekursu nian tinan oin mak Munisípiu Manufahi, karik Munisípiu Lautém rai klaru ona pakote ida de’it ba tinan oin posibilidade sei iha Munisípiu ida ba tinan oin nian, nune’e ekipa tékniku sira sei mai halo estudu viabilidade nune’e bele avansa ba konkursu tinan oin nian.

Hafoin remata Audiensia, Sua.Eselénsia, Prezidente Autoridade Munisipál Lautém, 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬, 𝐒𝐇, akompania ho Diretora Diresaun Servisu Munisipál Rejistu Notariadu no Sua.Eselénsia, Prezidente Tribunal Rekursu 𝐒𝐫. 𝐃𝐞𝐨𝐥𝐢𝐧𝐝𝐨 𝐝𝐨𝐬 𝐒𝐚𝐧𝐭𝐨𝐬, Diretor Geral akompaña mós enjeñeiru hala’o survei no observa rai atu harii edifisiu Tribunal Judicial Primeira Instansia nian iha Munisípiu Lautém.

𝑹𝒆𝒎𝒂𝒕𝒂

𝑴é𝒅𝒊𝒂 𝑷𝑨𝑴-𝑳𝒂𝒖𝒕é𝒎