𝐋𝐨𝐬𝐩𝐚𝐥𝐨𝐬, 𝐊𝐢𝐧𝐭𝐚-𝐟𝐞𝐢𝐫𝐚, 𝟏𝟎 𝐀𝐛𝐫𝐢𝐥 𝟐𝟎𝟐𝟓

𝐒𝐮𝐚.𝐄𝐬𝐞𝐥é𝐧𝐬𝐢𝐚, Prezidente Autoridade Munisipál Lautém, 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬, 𝐒𝐇, husu Autoridade Postu no Suku kontinua koopera ho Polísia Nasionál Timor-Leste (PNTL), Munisípiu Lautém, atu nune’e bele asegura situasaun iha Munisípiu Lautém, nune’e hodi kria estabilidade amizade, nune’e komunidade sira moris ho situasaun livre hodi buka moris atu sustena sira nia moris loroloron, nune’e mós emprezáriu lokál, nasionál no internasionál sira bele halo dezenvolvimentu iha Munisípiu Lautém hodi fó servisu fali ba jerasaun foun sira, lia hirak ne’e hato’o iha ámbitu abertura eventu jogu desportiva hodi komemora loron Polísia Nasionál Timor-Leste (PNTL) ba dala 25 iha Munisípiu Lautém ho tema “𝙃𝙖𝙢𝙪𝙩𝙪𝙠 𝙄𝙩𝙖 𝙃𝙖𝙢𝙚𝙩𝙞𝙣 𝙆𝙤𝙣𝙛𝙞𝙖𝙣𝙨𝙖”, ne’ebé hala’o iha Salaun Polísia Nasionál Timor-Leste (PNTL) Munisípiu Lautém.

Iha intervensaun, Sua.Eselénsia, Prezidente Autoridade Munisipál Lautém, 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬, 𝐒𝐇, husu Autoridade Postu, Autoridade Komunitária no Aldeia kontinua koopera nafatin Polísia Nasionál Timor-Leste (PNTL) Munisípiu Lautém hodi asegura situasaun iha Munisípiu Lautém hodi nune’e bele kria hakmatek estabilidade amizade, nune’e Komunidade sira bele livre iha situasaun ne’ebé hakmatek, hodi hala’o ida-idak nia atividade agrikultura no negósiu ekonomia hodi sustenta moris loroloron nian, nune’e mós emprezáriu sira bele garantia bele halo investimentu hodi kontinua fó servisu ba joven sira.

Nia esplika, atuál Komandante Polísia Nasionál Timor-Leste (PNTL) Munisípiu Lautém, ne’ebé hamutuk ho nia membru sira ho sakrifísiu no vontade tomak hodi asumi papél ho responsabilidade ne’ebé Estadu no Povu fó, hodi hala’o Lei no Ordem hodi servisu hamutuk ho Autoridade Postu, Autoridade Suku, Aldeia no Komunidade sira hotu, nune’e bele kria unidade no estabilidade.

Prezidente Autoridade Munisipál Lautém fó agradese ba Komandante Polísia Nasionál Timor-Leste (PNTL) Munisípiu Lautém ho nia membru sira hotu, tanba durante mandatu Prezidente Autoridade Munisipál Lautém ho nia estrutura tomak tinan ida resin ona, maibe grau Criminalidade iha Munisípiu Lautém menus tebes.

Nune’e mós, Prezidente Autoridade Munisipál Lautém kongratula no apresiasaun ba Komisaun Organizadora ne’ebé bele organiza eventu desportiva no jogu amizade iha ámbitu selebrasaun tinan 25 ba loron PNTL nian ne’ebé ho tema jerál “𝙃𝘼𝙈𝙐𝙏𝙐𝙆 𝙄𝙏𝘼 𝙃𝘼𝙈𝙀𝙏𝙄𝙉 𝙆𝙊𝙉𝙁𝙄𝘼𝙉𝙎𝘼”.

Tanba ida ne’e konvida komunidade sira hotu, bele asiste eventu desportiva no jogu amizade ida ne’e ho objetivu atu kria amizade ne’ebé di’ak entre PNTL no Komunidade, PNTL no Autoridade lokál, PNTL no Sosiedade sira hotu iha Munisípiu Lautém.

Ekipa jogadór sira ne’ebé atu partisipa atividade eventu desportiva no jogu amizade ida ne’e, la’os mai atu hadau prémiu no hadau primeiru lugár no segundu lugár, maibé jogu amizade ida ne’e hodi selebra loron PNTL nian, nune’e bele manán konfiansa parte komunidade no PNTL Munisípiu Lautém, nune’e bele nafatin servisu hamutuk ba oin hodi bele atinji objetivu finál mak estabilidade no unidade iha Munisípiu Lautém.

Entretantu, Komisaun Organiza rejistu klubu hamutuk 15 hodi kompete eventu desportiva, Jogu Futsal ba Mane no Voliball Mane no Feto, ne’ebé envolve mós husi membru PNTL Munisípiu Lautém klubu rua.

Aniversáriu tinan 25 ba Polísia Nasionál Timor-Leste (PNTL) Munisípiu Lautém liu husi Komisau Organizadora hodi hala’o mós preparasaun ba asaun karidade ne’ebé finansia husi Kompañia Salvasaun loja no.3 Lospalos, hamutuk pakote 75 ne’ebé Komisaun Organizadora identifika ba komunidade vulneravel sira iha Aldeia 11 Suku Fuiloro, Postu Administrativu Lospalos, hodi fahe ba komunidade vulneravel ne’ebé reprezenta Aldeia 11.

𝙍𝙚𝙢𝙖𝙩𝙖

(𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢)