𝐋𝐚𝐮𝐭é𝐦, 𝐓𝐞𝐫𝐬𝐚-𝐟𝐞𝐢𝐫𝐚, 𝟏𝟎 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Autoridade Munisipál Lautém, liu husi Sekretáriu Munisipál Assuntu Sosiais no Organizasaun Komunitária hamutuk ho Xefe Departamentu Apoiu Suku hala’o enkontru ho Administradór Postu Administrativu Lautém no Xefe Suku sira kona-ba Koordenasaun Servisu ba dadús Populasaun ho Manuál Siigsa no Kontinuasaun ba Planu Dezenvolvimentu Komunitária, ne’ebé organiza husi Administrasaun Postu Lautém, iha Salaun Administrasaun Postu Lautém.

Iha intervensaun, Sekretáriu Munisipál Assuntu Sosiais no Organizasaun Komunitária 𝐒𝐫. 𝐙𝐞𝐟𝐞𝐫𝐢𝐧𝐨 𝐝𝐨𝐬 𝐒𝐚𝐧𝐭𝐨𝐬 𝐒𝐞𝐪𝐮𝐞𝐢𝐫𝐚 esplika, Nonu Governu Konstituisionál nia programa prioridade mak atu estabelese desentralizasaun podér lokál iha Territóriu Timor laran tomak molok mandatu remata iha tinan 2028.

Tanba ida ne’e, hahú iha tinan 2024, Governu liu husi Ministériu Administrasaun Estatal (MAE) hala’o Avaliasaun Kondisaun Mínimu ba kada Munisípiu inklui Minisípiu Lautém, agora iha tinan 2024 Ministériu Administrasaun Estatal fó sai rezultadu Avaliasaun Kondisaun Mínimu, maibé laiha Munisípiu ida mak prienxe rekezitu ba Avaliasaun Kondisaun Mínimu, nune’e Ministériu Administrasaun Estatal orienta kada Munisípiu inklui Munisípiu Lautém, hala’o servisu hamutuk ho Xefe Suku no Xefe Aldeia sira ho másimu, tanba iha tinan 2025 sei kontinua halo Avaliasaun Kondisaun Mínimu eseptu Autoridade Administrativa Atauro no RAEOA.

Nune’e Sekretáriu Munisipál Asuntu Sosiais no Organizasaun Komunitária salienta, iha loron 29 Dezembru 2025, Ministériu Administrasaun Estatal fó sai rezultadu ba Avalisaun Kondisaun Mínimu ba kada Munisípiu sira, ne’ebé partisipa másimu husi Diretor/a Servisu Munisipál, Sekretáriu Munisipál no Prezidente Autoridade Munisipál sira ne’ebé hatudu Munisípiu 5 inklui Munisípiu Lautém mak hetan valór Muito Bom.

Nia dehan tuir Planu husi Nonu Governu Konstituisionál liu husi Ministériu Administrasaun Estatal sei anunsia rezultadu finál ba Avaliasaun Kondisaun Mínimu nian iha loron 20 Maiu 2026, ba Munisípiu ne’ebé merese atu hakat ba Desentralizasaun Poder Lokál hodi tuir Eleisaun Kamara Munisipál iha tinan 2027, desizaun sei mai husi Konsellu Ministru, nune’e Munisípiu Lautém tenke prepara dadus sira hotu, ne’ebé fontes mai husi Suku no Aldeia.

Iha fatin hanesan Administrador Postu Administrativu Lautém, 𝐒𝐫. 𝐀𝐧𝐚𝐜𝐥𝐞𝐭𝐨 𝐅𝐞𝐫𝐧𝐚𝐧𝐝𝐞𝐬 𝐗𝐚𝐯𝐢𝐞𝐫 hatutan, halo enkontru ho Autoridade Munisipál Lautém hodi haforsa ita oinsá bele prienxe formatu dadus hodi hetan solusaun atu konklui dadus sira ne’e iha fulan Marsu nia laran.

Tanba ida ne’e Administradór Postu Administrativu Lautém husu ba Xefe Suku sira Planu Dezenvolvimentu Komunitária ne’e importante tebes ne’ebé la’o ona, maibé seidauk konklui, nune’e Xefe Suku sira hotu tenke esforsu nafatin, bainhira presiza apoiu husi ekipa Munisípiu no Postu hodi fasilita ba Suku sira ne’ebé presiza hodi fó asisténsia atu bele konklui iha fulan Marsu hodi aprezenta iha Munisípiu kontinua ba iha Nasionál.

Enkuantu hahú iha fulan Janeiru to’o Dezembru 2025 dadús totál Populasaun tuir Portal Munisipál hamutuk 94.161 Pesoas, Uma Kain 19.509, Aleinde dadús tuir Siigsa hamutuk 90.908 Uma Kain tuir Siigsa hamutuk 19.884 ne’ebé aprova husi kada Xefe Suku hodi submete mai iha Munisípiu.

𝙍𝙚𝙢𝙖𝙩𝙖

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢