𝐋𝐨𝐬𝐩𝐚𝐥𝐨𝐬, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟐𝟑 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Autoridade Munisipál Lautém, liu husi Servisu Munisipál Programa Nasional Dezenvolvimentu Suku (PNDS) Munisípiu Lautém hala’o sosializasaun kona-ba programa PNDS tinan 2026 ne’ebé hahú Sosializasaun ba implementasaun, atu nune’e Administrador Postu, Xefe Suku no Ekipa tékniku PNDS sira iha Postu bele intende Sistema hodi bele servisu tuir, Sosializasaun ne’e hetan abertura husi 𝐒𝐮𝐚 𝐄𝐬𝐞𝐥𝐞𝐧𝐬𝐢𝐚 Prezidente Autoridade Munisipál Lautém, ne’ebé hala’o iha Salaun Administrasaun Autoridade Munisipál Lautém.

Iha intervensaun 𝐒𝐮𝐚 𝐄𝐬𝐞𝐥𝐞𝐧𝐬𝐢𝐚, Prezidente Autoridade Munisipál Lautém, 𝐒𝐫. 𝐌𝐞𝐥𝐢𝐨 𝐝𝐞 𝐉𝐞𝐬𝐮𝐬 𝐒𝐇 husu ba Xefe Suku sira identifika prioridade projetu ligadu ba nesesidade sira ne’ebé benefísiu direta ba komunidade sira, hanesan, dada Be Mos ba komunidade sira, halo Sede Aldeia ne’ebé laiha, halo estrada ba Aldeia sira atu nune’e komunidade sira bele lori sira nia produtu ba iha merkadu. Aleinde ne’e mós husu ba Xefe sira ba natar sira ne’ebé mak seidauk iha irigasaun bele tau iha prioridade atu konstrui irigasaun ba natar sira.

Nune’e Prezidente Autoridade Munisipál salienta tan katak, Xefe Suku sira ekipa tékniku PNDS sira iha kada Postu nafatin halo enkontru ho komunidade sira hodi hili nesesidade prioridade sira hodi tau programa atu nune’e bele hadi’a, nune’e mós bele dezenvolve sentru área turizmu nian, hodi bele hetan filafali reseita.

Iha fatin hanesan Diretor Servisu Munisipál Programa Nasional Dezenvolvimentu (PNDS) 𝐒𝐫. 𝐀𝐜𝐚𝐜𝐢𝐨 𝐂𝐚𝐫𝐯𝐚𝐥𝐡𝐨 hatutan, objetivu husi Sosializasaun ida ne’e atu implementasaun Programa Nasionál Dezenvolvimentu Suku (PNDS) nian ne’ebé kada tinan implementa bazeia ba mata dalan PNDS.

Diretór ne’e fundamenta tan katak, etapa implementasaun PNDS iha etapa hamutuk 8 hahú husi Sosializasaun, implementasaun no finál, tanba ne’e inísiu tinan 2026 PNDS Munisípiu Lautém hahú hala’o Sosializasaun iha nivel Munisípiu ne’ebé partisipa direta husi Administradór Postu, xefe Lokál Planeamentu Desenvolvimentu Lokál, Xefe Suku, Presidente KPR no funsionáriu PNDS tomak hodi nune’e bele ita intende bainhira implementasaun programa PNDS nian iha Munisípiu Lautém.

Nia realsa tan, daudaun ne’e PNDS tutela ona iha Autoridade Munisipál Lautém nian, tanba ida ne’e mata dalan ne’ebé iha mantein hodi bele la’o tuir, tanba PNDS iha sistema foun mak Informasaun Dadus Analizes (IDA) atu nune’e ekipa Munisípiu no Postu sei input dadus ba iha sistema IDA ne’e, atu nune’e iha futuru iha auditoria ruma hodi bele responde.

𝙍𝙚𝙢𝙖𝙩𝙖

𝙈𝙚𝙙𝙞𝙖 𝙋𝘼𝙈-𝙇𝙖𝙪𝙩𝙚𝙢