𝐋𝐨𝐬𝐩𝐚𝐥𝐨𝐬, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟏𝟑 𝐀𝐛𝐫𝐢𝐥 𝟐𝟎𝟐𝟔

Instituto Nasionál Estatístika Timor-Leste, Instituto Públiku (INETL, I.P), hala’o sosializasaun no fahe informasaun kona-ba Estabilizasaun no Modernizasaun Sistema Koleksaun Dadus kona-ba Civil Rejistrasaun Vital Estatístika (CRVS) ba Xefe Suku no apoiu Suku asuntu Sosiais sira, atu bele harmoniza dadus ba populasaun sira iha Suku sira nune’e númeru dadus populasaun labele iha diferensia, enkontru sosializasaun ne’e durante loron tolu hahu iha loron 13 Abril no remata iha loron 15 Abril 2026, iha Salaun Administrasaun Autoridade Munisipál Lautém.

Iha intervensaun, Sekretáriu Munisipál Asuntu Sosiais no Organizasaun Komunitária (ASOK) Sr. Francisco dos Santos hateten, sosializasaun ida ne’e atu fahe informasaun dadus kona-ba populasaun moris, mate, sai, tama no muda ne’ebé iha Livru 18 ba kada Suku sira.

Tanba durante vizita Sekretáriu Munisipál Asuntu Sosiais no Organizasaun Komunitária ba Suku sira iha Munisípiu Lautem hodi observa direta ba livru 18, maibé apoiu Suku sira seidauk iha intende didiak livru no seidauk utiliza livru sira ne’e ho másimu.

Iha okaziaun ne’e, Sekretáriu Munisipál Asuntu Sosiais no Organizasaun Komunitária, husu ba Xefe Suku sira no apoiu Suku na’in 4 ne’e tutela iha Xefe sira nian, nune’e atu orienta apoiu Suku sira hodi priense livru 18 ne’ebé fahe ba ona kada Suku sira, atu nune’e bele garantia kualidade dadus populasaun sira nian iha futuru.

Iha fatin hanesan, Diretor Sistema no Relatóriu iha INETL, I.P Sr. Silvino Lopes hatutan, enkontru ida ne’e atu fahe informasaun ba Xefe Suku no apoiu Suku ba asuntu sosiais sira, atu bele haree oinsá halo harmonizasaun dadus populasaun kada Suku sira hotu iha Munisípiu Lautém, nune’e iha futuru númeru populasaun ne’ebé hanesan.

Diretor ne’e mós fundamenta tan, enkontru ida ne’e mós atu introdús sistema dijitalizasaun ba rekolla dadus ne’ebé mak naran Civil Rejistrasaun Vital Estatístika (CRVS) iha Munisípiu hotu-hotu inklui Munisípiu Lautém, ne’ebé partisipante sira mai husi Suku 34 ho nia apoiu Suku asuntu sosiais nian atu nune’e bele iha informasaun ne’ebé klean hodi bele kompleta kolekta dadus ne’ebé utiliza Sistema (CRVS).

Aleinde ne’e mós Estatístika mós sei apoiu tablet hamutuk 34 ba Suku iha Munisípiu Lautém, atu nune’e apoiu Suku asuntu sosiais bele update numeru populasaun bainhira iha mudansa, ne’ebe sei haruka ba Munisípiu hetan aprovasaun kontinua manda ba nasionál.

Média PAM-Lautém