𝐋𝐨𝐬𝐩𝐚𝐥𝐨𝐬, 𝐒𝐞𝐱𝐭𝐚-𝐟𝐞𝐢𝐫𝐚, 𝟐𝟒 𝐉𝐮𝐥𝐥𝐮 𝟐𝟎𝟐𝟔

Reprezentante Prezidente Autoridade Munisipál Lautém, Sekretáriu Munisipál Assuntu Sosiais no Organizasaun Komunitária 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐃𝐨𝐬 𝐒𝐚𝐧𝐭𝐨𝐬 akompaña ho Diretor Servisu Munisipál hamutuk ho família haloot ona saudozu João Da Costa Miranda “ Romit Watumisa” iha Postu Administrativu Luro Lakawa.

Iha intervensaun, reprezentante Prezidente Autoridade Munisipál Lautém, Sekretáriu Munisipál Assuntu Sosiais no Organizasaun Komunitária 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐃𝐨𝐬 𝐒𝐚𝐧𝐭𝐨𝐬 lori estrutura Prezidente Autoridade Munisipál Lautém, Delegasaun Teritorial sira hotu no lider komunitáriu sira hato’o sentidu kondolénsia kle’an ba família no feto faluk oan kiak ba saudozu João Da Costa Miranda “Romit Watumisa” nia falesimentu.

Sekretáriu Munisipiu Lautem Assuntu Sosiais no Organizasaun Komunitaria ne’e esplika, laiha moris no laiha mate, moris mak inísiu no mate mak nia fin, moris mai iha mundu hanesan peregrinasaun ida, tanba ida ne’e nu’udar Autoridade Munisipál Lautém husu ba família feto faluk no oan kiak no família sira ho aten brani hodi simu realidade ida ne’e no forsa nafatin ba ita-nia fiar mak ita moris.

Aleinde saudozu hahú partisipa ba luta libertasaun nasionál, inísiu fulan Setembru 1975, saudozu hamutuk ho milísia Fretilin hetan orientasaun no kolokadu iha fronteira Batu Gade ne’ebé komanda husi saudozu Adão Amaral.

Baze de Apoiu, iha tinan 1976-1977 saudozu nomeadu sai komandante peletão ho kargu ne’ebé nia simu saudozu hamutuk ho nia maluk sira seluk ba hala’o seguransa iha baliza entre konsellu Lautem ho Konsellu Baucau área Quelekai hodi monta barreira atu satán netik inimigu ne’ebé hahú invade Timor.

Frente Klandestinu, iha tinan 1980-1981 ho kondisaun saúde ne’ebé seidauk rekupera didi’ak saudozu kontinua hala’o kontaktu ho nia kompañeiru da luta, mak hanesan saudozu vida naruk, Pedru de Jesus Miranda/Kauda no Saudozu Komandante Mauk Moruk liu husi kanál estafeta Francisco Ribeiro no seluk.

Saudozu João Miranda “Watumisa” moris iha loron 24 Junho 1948, Aldeia Oneraba, Suku Lacawa, Postu Administrativu Luro Munisípiu Lautém, oan husi Pedro Belo/Tiloso, Uma Lisan Taubili no Inan Bualau/Tiloso husi Uma Lisan Bolebe, saudozu João Miranda “Watumisa” ba oan da 4 husi maun alin 6.

Enkuantu, Saudozu João Da Costa Miranda “Romit Watumisa” durante tinan ida hala’o tratamentu iha Hospital Nasional Guido Valadares no Hospital Lahane, maibe Maromak hadomi liu Saudozu ho nune’e saudozu fila hikas ba Aman Maromak iha loron 16 Jullu 2026 14:22 Otl, iha sala ICU Hospital Nasional Guido Valadares Díli.

Remata Media PAM-Lautem