LANSAMENTU EDUKASAUN SÍVIKA HO TEMA “ELEVA KOÑESIMENTU HODI PROMOVE PARTISIPASAUN ELEITOR IHA ELEISAUN SUKU IDA NE’EBÉ INKLUSIVU NO PARTISIPATIVU” IHA SUKU EUQUISI

Lospalos, Kinta-Feira, 24 Agostu 2023

Administrador Munisípiu Lautém, Sr. Domingos Sávio, M.Si, partisipa atividade lansamentu Edukasaun Sívika ho tema “Eleva Koñesimentu Hodi Promove Partisipasaun Eleitor Iha Eleisaun Suku Ida Ne’ebé Inklusivu no Partisipativu” atividade lansamentu ne’e orgoniza husi Komisaun Nasionál Eleisoens (CNE), ne’ebé mak hala’o iha Aldeia Vaniria, Suku Euquisi, Postu Administrativu Lautém, Munisípiu Lautém.

Lider másimu Munisípiu Lautém, dehan, atividade lansamentu ida ne’e hanesan marka História foun ida ba Munisípiu Lautém, liu-liu iha Aldeia Vaniria Suku Euquisi, Postu Lautém Munisípiu Lautém. Aldeia ne’ebé maka anterior liu, maibé hili fátin ida ne’e sai fatin lansamentu ba eleisaun Autoridade Komunitária sira, tambá lansamentu ida ne’e maka reprezenta suku sira iha teritóriu laran tomak iha Munisípiu Lautém.

Nia dehan, Administrador Postu sira ne’ebé mak iha esperiensia sei koloka iha fatin hodi sosializa atu fo apoiu, nune’e eleisaun Suku Komunitária bele la’o ho di’ak no susesu. Administrador Munisípiu Lautém apela ba Administrador Postu sira, bele akompaña eleisaun Suku ida ne’e ho susesu, tambá agora demokrasia fó oportunidade ba sidadaun feto no mane bele kandidatu an, atu lidera Suku ida hodi dezenvolve nia Aldeia, Suku, Postu no Munisípiu.