𝐌𝐞𝐡𝐚𝐫𝐚, 𝐓𝐞𝐫𝐬𝐚-𝐟𝐞𝐢𝐫𝐚, 𝟒 𝐀𝐠𝐨𝐬𝐭𝐨 𝟐𝟎𝟐𝟔

Serimónia Kultural Tara Bandu inisiativa husi Administrador Postu Administrativu Tutuala ho nia estrutura tomak, ne’ebé organiza enkontru ida ho Komandante PNTL Eskuadra Postu Tutuala, Veteranu/a, Lia Na’in, Na’in ba Rai, Xefe Suku no Konsellu Suku Tutuala no Mehara nian, hodi deside atu halo atividade ka serimónia Tara Bandu ne’ebé hanesan meius ida hodi reforsa dekretu lei númeru 33/2008 loron 27 Agosto ko’alia kona-ba Hijiene Orden Pùbliku, nune’e komunidade sira labele husik animál livre iha fatin públiku, atividade serimónia Tara Bandu hala’o iha Kampu Unidade Nasionál Mehara, Postu Administrativu Tutuala, Munisípiu Lautém.

Iha intervensaun, reprezentante Prezidente Autoridade Munisípiu Lautém, Sekretáriu Munisípiu Assuntu Sosiais no Organizasaun Komunitária 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬 hateten,

Administradór Postu Postu Tutuala marka tan historia foun ida iha nivel Munisípiu Lautém, ne’ebé iha vontade rasik hodi kria atividade Tara Bandu ba animál sira, ne’ebé durante la’o livre iha kapitál Postu Administrativu Tutuala nian.

Nune’e, nu’udar Autoridade Munisípiu apresia tebes inisiativa husi Autoridade Postu Tutuala nian, kulturalmente ita halo hamutuk hodi fó korajen ba komunidade sira ne’ebé hakiak animál hanesan, Karau, Bibi, Fahi no Kuda atu labele husik livre iha fatin públiku sira.

Sekretáriu Munisipál Assuntu Sosiais no Organizasaun Komunitária ne’e salienta, durante ne’e sosializasaun Lei 3 ba Hijiene Orden Publiku ba komunidade sira, maibé presiza atu reforsa tan ba Tarabandu ida ne’e atu nune’e komunidade sira bele la’o tuir.

Iha fatin hanesan Administrador Postu Administrativu Tutuala 𝐒𝐫. 𝐂𝐚𝐫𝐥𝐢𝐭𝐨 𝐏𝐞𝐫𝐞𝐢𝐫𝐚 haktuir, atividade Tara Bandu ida ne’e ho objetivu atu reforsa dekretu Lei artigu 33 ne’ebé mak hetan primeiru alterasaun, sai ona dekretu 3, 17 Agosto 2024.

Ne’e duni ho inisiativa ida husi Autoridade Postu Administrativu Tutuala nian hala’o atividade Tara Bandu, bainhira komunidade sira nia animál la’o livre nafatin iha públiku sira, ekipa ne’ebé forma husi Postu nian oho ho avontade, tanba lia na’in sira ne’ebé hameno Ai Lulik ne’e todan, Ai Lulik ida ne’e mahon Bandeira RDTL nian.

Administradór Postu Tutuala garante ba lia na’in sira hahú husi Suku Tutuala, Mehara no lia na’in Postu Tutuala nian ne’ebé hameno tuir, hodi reforsa ba dekretu Lei 3 ba iha Hijiene no Orden Publiku.

Serimónia ne’e sasin husi reprezentante Prezidente Autoridade Munisipál Lautém, Sekretáriu Munisipál Assuntu Sosiais no Organizasaun Komunitária, Administrador Postu Administrativu Tutuala, Komandante Eskuadra Postu Tutuala, Xefe Suku Mehara no Tutuala, Konsellu Suku rua nian, Konsellu Suku Tutuala no Mehara, Veterano/a Lia Na’in kada knua, na’in ba animál no komunidade sira.

𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢