𝐋𝐨𝐬𝐩𝐚𝐥𝐨𝐬, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟔 𝐉𝐮𝐥𝐥𝐮 𝟐𝟎𝟐𝟔
Autoridade Munisipál Lautém realiza serimónia Içar Bandeira Nasionál ba semana dahuluk fulan Jullu hodi hato’o respeitu ba nasaun no fó valór patriotizmu no nasionalizmu ba Povu no Rai ida ne’e, iha serimonia Içar Bandeira reprezentante Prezidente Autoridade Munisipál Lautém, Sekretáriu Munisipál Planeamentu Investimentu no Dezenvolvimentu Integradu (PIDI) mak sai inspector serimónia Içar Bandeira, ne’ebé responsavel husi Diresaun Servisu Delegasaun Teitorial sira hanesan Ministériu de Solidariedade Sosial no Inklusaun, SERVE I.P, Ambiente, Instituto Nasionál Seguransa Sosial, Instituto de Apoiu Dezenvolvimentu Emprezarial no Ministériu Komersiu Industria, serimónia Içar Bandeira Nasional hala’o iha resintu Administrasaun Autoridade Munisipál Lautém.
Intervensaun reprezentante Prezidente Autoridade Munisipál Lautém, Sekretáriu Munisipál Planeamentu Investimentu no Dezenvolvimentu Integradu (PIDI) 𝐒𝐫. 𝐓𝐢𝐛𝐮𝐫𝐬𝐢𝐨 𝐃𝐨𝐬 𝐒𝐚𝐧𝐭𝐨𝐬 husu ba Diretor/a Servisu Munisipál no Diretor/a Delegasaun Teritorial sira kontrola nafatin funsionáriu tenke kumpre tempu ka oras servisu nian tama no sai, nune’e mós tau as disiplina kada funsionáriu iha servisu fatin hodi atende ba públiku.
Sekretáriu Munisipál Planeamentu Investimentu no Dezenvolvimentu Integradu (PIDI) alerta ba Diresaun Servisu Munisipal Planu Investimentu no Dezenvolvimentu no Diresaun Servisu Munisipál Programa Nasionál Dezenvolvimentu Suku (PNDS) ne’ebé foku liu ba área infraestrutura sira, liu husi programa PDIM no PNDS nafatin presiza tau atensaun, hodi nune’e infraestrutura sira ne’e bele la’o ho di’ak no kualidade, atu nune’e labele fó prezudika ba Orsamentu Jerál Estadu (OJE) 2027 nian mai iha Munisípiu Lautém.
Aleinde ne’e mós reprezentante Prezidente Autoridade Munisipál Lautém husu ba Diretor Servisu Munisipál no Diretor/a Delegasaun Teritoriál sira iha Munisípiu Lautém tenke orienta nafatin funsionáriu atu partisipa serimónia Icar Bandeira nasionál hodi fó valór ba Heroi no Heroina sira ne’ebé uluk sakrifika an tomak ba rai ida ne’e hodi hetan Independensia total.
𝙈𝙚𝙙𝙞𝙖 𝙋𝘼𝙈-𝙇𝙖𝙪𝙩𝙚𝙢
𝐋𝐨𝐬𝐩𝐚𝐥𝐨𝐬, 𝐊𝐢𝐧𝐭𝐚-𝐟𝐞𝐢𝐫𝐚, 𝟐 𝐉𝐮𝐥𝐥𝐮 𝟐𝟎𝟐𝟔
Autoridade Munisipál Lautém liu husi Diresaun Servisu Munisipál Asaun Sosial organiza atividade Talk Show hodi fó sai informasaun no hasa’e konsiénsia públiku nian kona-ba prosesu desentralizasaun no podér lokál iha Timor-Leste espesiál iha Munisípiu Lautém, atividade Talk Show ne’e hala’o iha Studiu Rádio Comunidade Lospalos (RCL).
Atividade Talk Show ne’e mós oinsá atu reforsa kapasidade feto no ema ho defisiénsia sira nia komprensaun kona-ba sira nia direitu no papél iha governasaun lokál hodi kria platforma debate ba stakeholder sira diskute dezafiu no oportunidade ba partisipasaun feto nian.
Hafoin remata atividade Talk Show iha intervista Diretora Servisu Munisipál Asaun Sosiál 𝐒𝐫𝐚. 𝐀𝐧𝐚 𝐃𝐚 𝐒𝐢𝐥𝐯𝐚 hateten, halo atividade tolk sow ida ne’e oinsá atu reforsa kapasidade feto no ema ho defisiénsia nian ba iha prosesu desentralizasaun podér lokál.
Tanba desentralizasaun hanesan pasu importante ida ba Timor-Leste nia dezenvolvimentu demokrátiku, partisipasaun ativa husi feto iha nivel lokál mak esensiál atu asegura inkluzivu no desizaun polítika sira ne’ebé reflete nesesidade komunidade tomak.
Diretora ne’e mós esplika, Rádiu Talk Show ida ne’e atu kria espasu públiku ne’ebé feto no ema ho defisiénsia sira bele partilla esperiénsia no hetan informasaun kona-ba papél sira nian iha prosesu desentralizasaun no podér lokál.
Enkuantu Orador sira ne’ebé partisipa atividade talk show ne’e mai husi reprezentante Sekretária Estadu Ingualdade (SEI) Pontu Fokal iha Munisípiu Lautém esplika foka liu ba polítika, programa no mekanizmu sira hodi promove igualdade jéneru no inkluzaun sosiál iha nivel lokál.
Enkuantu reprezentante Feto Potensial husi Asosiasaun Feto Lautém (AFEL) partilla esperiénsia rasik no perspetiva kona-ba dezafiu sira ne’ebé hasoru iha prosesu partisipasaun lokál.
Nune’e mós husi reprezentante NGO Rais Hadomi Timor Oan (RHTO) partilla perspetiva no programa sira ne’ebé implementa atu hametin partisipasaun ema ho defisiénsia sira iha prosesu foti desizaun polítika no ba desentralizasaun.
Ikus mak reprezentante Parlamentu Foin Sa’e ne’ebé esplika kona-ba polítika jerasaun foin sa’e nian sei fó perspetiva kona-ba partisipasaun feto foin sa’e iha vida polítika no governasaun lokál.
𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢
𝐋𝐨𝐬𝐩𝐚𝐥𝐨𝐬, 𝐊𝐮𝐚𝐫𝐭𝐚-𝐟𝐞𝐢𝐫𝐚, 𝟏 𝐉𝐮𝐥𝐥𝐮 𝟐𝟎𝟐𝟔
Autoridade Munisipál Lautém liu husi Diresaun Servisu Munisipál Protesaun Civil no Jestaun Dezastre Naturais realiza enkontru regular ho membru konsellu munisipal protesaun sivil no komisaun jestaun dezastre naturais kada trimestral hodi relata asuntu liga liu ba dezastre naturais no inundasaun ne’ebé populasaun infrenta iha terenu bainhira iha tempu udan iha Munisípiu Lautém.
Iha intervensaun Sekretáriu Munisipál Assuntu Sosiais no Organizasaun Komunitária (ASOK) nu’udar segundu vise prezidente konsellu munisipál protesaun sivil no dezastre naturais 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐃𝐨𝐬 𝐒𝐚𝐧𝐭𝐨𝐬 hateten, prezisa tebes enkontru regular ida ne’e ba kada trimestral hodi relata ba malu ho assuntu importante ne’ebé liga liu ba populasaun sira nia moris.
Segundu vise prezidente konsellu munisipál protesaun sivil no dezastre naturais afirma tan, enkontru ida ne’e mos atu relata ba malu oinsa progressu servisu nian ne’ebe futuru sei hala’o hodi hala’o atendimentu ba komunidade sira, tanba ida ne’e maka enkontru regular ida ne’e importante tebes ba membru konsellu munisipál protesaun sivil no komisaun jestaun dezastre naturais atu partisipa.
Nune’e Sekretariu Munisipal orienta Xefe Suku sira liu Administrador Postu Administrativu sira tenke iha dadus ba populasaun sira liuliu ema ho vulneravel sira, tanba bainhira situasaun ne’e akontese mak Governu no Organizasaun ruma halo intervensaun apoiu ai han ruma presiza dadus ne’ebé ho lolos.
Tanba ida ne’e Sekretáriu Munisipál Assuntu Sosiais no Organizasaun Komunitária husu ba membru konsellu munisipál protesaun sivil no komisaun jestaun dezastre naturais nafatin prepara, tanba iha ona informasaun husi Diresaun Nasionál Metorolojia no Geofísiku katak Timor-Leste sei infrenta katasdro El Nino ka bai loron naruk ne’ebe sei provoka hamlaha no menus ba ai han.
Iha fatin hanesan Diretor Servisu Munisipál Protesaun Civil no Jestaun Dezastre Naturais 𝐒𝐫. 𝐂𝐚𝐬𝐦𝐢𝐫𝐨 𝐝𝐚 𝐀𝐬𝐬𝐮𝐧çã𝐨 𝐏𝐢𝐫𝐞𝐬 hatutan enkontru regular ida ne’e hala’o kada fulan tolu iha trimestre ida iha fulan ikus oinsá atu fahe informasaun ba malu nu’udar membru konsellu Munisipal Protesaun Sivil nian, atu haree situasaun hirak ne’ebe akontese iha Munisipiu Lautem, liuliu situasaun dezastre naturais ne’ebe afeita ba komunidade sira nia hela fatin no estraga komunidade sira nia animal sira ne’ebe hakiak.
Ho ida ne’e enkontru regular ida ne’e oinsa membru sira atu prepara atu atende situasaun sira tuir mai no prepara hala’o atendimentu ba komunidade sira ho dignu.
𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢
𝐋𝐨𝐬𝐩𝐚𝐥𝐨𝐬, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟐𝟗 𝐉𝐮ñ𝐮 𝟐𝟎𝟐𝟔
Estudante sira husi Universidade Nasionál Timor Lorosa’e (UNTL), husi Fakuldade Ekonómia Gestaun (FEG), kompostu husi Mane na’in 4 no Feto na’in 3 ne’ebé hala’o seriomónia despedida no han hamutuk ho Autoridade Munisipál Lautém, hafoin remata atividade programa estajiu profisionál durante fulan rua hahú iha fulan Abril no remata iha fulan Juñu iha Autoridade Munisipál Lautém.
Atu ensera atividade ne’e, reprezentante Prezidente Autoridade Munisipál Lautém, Sekretáriu Munisipál Administrasaun no Finansas 𝐒𝐫. 𝐙𝐞𝐟𝐞𝐫𝐢𝐧𝐨 𝐝𝐨𝐬 𝐒𝐚𝐧𝐭𝐨𝐬 𝐒𝐞𝐪𝐮𝐞𝐢𝐫𝐚 durante hala’o atividade estajiu profisional no pratika fulan bele kompleta dadus atu bele finaliza estudu iha Universidade
Tanba ne’e Sekretáriu Munisipál Administrasaun no Finansas agradese ba estudante sira husi Universidade Nasional Timor Lorosa’e (UNTL) ne’ebe durante hala’o atividade estajiu profisional, ne’ebé akompana no kumpri regra balun ne’ebé Autoridade Munisipál Lautém estabele liuliu servisu tuir tempu, siknifika estudante sira iha seriedade no vonrade atu apriende, tanba atividade sira ne’ebe iha terenu hanesan referensia no bukae ida ba estudante sira molok remata estudu iha Universidade.
Aleinde ne’e mos Autoridade Munisipal Lautem oferese Sertifikadu apresiasaun ida ba estudante sira nu’udar rekonesimentu ba estudante sira.
𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢
𝐋𝐨𝐬𝐩𝐚𝐥𝐨𝐬, 𝐓𝐞𝐫𝐬𝐚-𝐟𝐞𝐢𝐫𝐚, 𝟑𝟎 𝐉𝐮ñ𝐮 𝟐𝟎𝟐𝟔
𝐄𝐱𝐞𝐥é𝐧𝐬𝐢𝐚 Prezidente Autoridade Munisipál Lautém 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬 𝐒𝐇 lidera enkontru kona-ba melloramentu fornesimentu ba Programa Merenda Eskolar (PME), iha Munisípiu Lautém, enkontru ne’e hala’o iha Salaun Edukasaun Munisípiu Lautém.
Durante enkontru ne’e la’o 𝐄𝐱𝐞𝐥é𝐧𝐬𝐢𝐚 Prezidente Autoridade Munisipál Lautém 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬 𝐒𝐇 husu ba MOKATIL tun ba terenu hodi sosa komunidade sira produtu lokál ne’ebé kria husi Grupu Kooperativa hodi fornese ba Merenda Eskolar, atu nune’e osan sira ne’e bele sirkula de’it iha Munisípiu Lautém.
Relasiona ho Programa Merenda Eskolar, Autoridade Munisipál Lautém servisu hamutuk ho Ministériu Agrikultura Pekuária Peska no Floresta hodi estabelese programa Demo Plot Integradu Agrikultura ka toos uma huun ne’ebé apoiu orsamentu ba kada Suku hetan $200 no kada Postu $700 hodi kuda modo bele distribui ba merenda eskokar sira,
Prezidente Autoridade Munisipál Lautém sujere ba Prezidente MOKATIL presiza membru MOKATIL ida hodi destaka iha kada Eskola nune’e bele akompaña nafatin te’in na’in sira, nune’e mós fornese ai-han ne’ebé fresku no fornese hahán iha tempu loron.
Enkuantu daudaun ne’e MOKATIL fornese ai-han ba Ensinu Baziku Central (EBC), Ensinu Baziku Filial (EBF) no Eskola Pre-Eskolar (EPE) hamutuk 130 iha Munisípiu Lautém.
Enkuantu partisipa enkontru melloramentu fornesimentu Merenda Eskolar ne’e partisipa mai husi Superientedente, Prezidente MOKATIL, Pontu Focal Agensi UN.WFP Municipál Lautém, Diretor Eskola, Gabinete Apoiu Téniku (GAT), Koordenador Merenda Eskolar, Koordenador Grupu Komunitária ho nia membru sira, Inspektor Eskolar sira.
𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢
𝐋𝐚𝐮𝐭é𝐦, 𝐓𝐞𝐫𝐬𝐚-𝐟𝐞𝐢𝐫𝐚, 𝟑𝟎 𝐉𝐮ñ𝐮 𝟐𝟎𝟐𝟔
𝐄𝐱𝐞𝐥é𝐧𝐬𝐢𝐚 Prezidente Autoridade Munisipál Lautém akompaña ho Komandante Eskuadra Postu Lautém, Sekretáriu Munisipál Planeamentu Investesimentu Dezenvolvimentu Integradu (PIDI), Diretor Servisu Munisipál Programa Nasionál Dezenvolvimentu Suku (PNDS), Diretor Servisu Munisipál Obras Públika (MOP), Diretor Servisu Munisipál Planu Investesimentu Dezenvolvimentu (SMPID), Administrador Postu Lautém, Lore, Lospalos hala’o ofisialmente hatur faluk dahuluk ba Konstrusaun Sede Aldeia Ira-Ara liu husi Programa Nasionál Dezenvolvimentu Suku (PNDS) ba tinan 2026 iha Munisípiu Lautém.
Komunidade Aldeia Ira-Ara presiza tebes mahon ida apropriadu ba komunidade sira, atu nune’e komunidade sira bele halibur hodi realiza enkontru no diskute ruma relasiona ho problema sosial ekonomiku no seluk tan ne’ebé komunidade Aldeia Ira-Ara infrenta durante ne’e.
Iha intervensaun 𝐄𝐱𝐞𝐥é𝐧𝐬𝐢𝐚 Prezidente Autoridade Munisipál Lautém, 𝐒𝐫. 𝐌é𝐥𝐢𝐨 𝐝𝐞 𝐉𝐞𝐬𝐮𝐬 𝐒𝐇 apresia ba komunidade Aldeia Ira-Ara Suku Parlamentu ne’ebé ho inisiativa rasik hodi halo konstrusaun futsal ba multi funsaun, siknifika komunidade Aldeia Ira-Ara mós iha kontribuisaun ba prosesu dezenvolvimentu iha era ukun an nian.
Tanba ida ne’e Exelénsia Prezidente Autoridade Munisipál Lautém husu ba komunidade sira Aldeia Ira-Ara nafatin koopera ho Programa Nasionál Dezenvolvimentu Suku (PNDS) ne’ebé implementa konstrusaun Sede Aldeia Ira-Ara nian, atu nune’e konstrusaun ida ne’e bele finaliza lalais.
𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢
𝐋𝐚𝐢𝐯𝐚𝐢, 𝐊𝐢𝐧𝐭𝐚-𝐟𝐞𝐢𝐫𝐚, 𝟐𝟓 𝐉𝐮ñ𝐮 𝟐𝟎𝟐𝟔
Reprezentante Prezidente Autoridade Munisipál Lautém, Sekretáriu Munisipál Assuntu Sosias no Organizasaun Komunitária (ASOK) 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐃𝐨𝐬 𝐒𝐚𝐧𝐭𝐨𝐬 akompaña ho Xefe Gabinete Prezidente Autoridade, Diretor Servisu Munisipál Agrikultura Munisípiu Lautém, Diretor Servisu Munisipál Protesaun Sivil hamutuk ho Ministru Agrikultura Pekuária Peska no Floresta 𝐒𝐫. 𝐌𝐚𝐫𝐜𝐨𝐬 “𝐌𝐚𝐦𝐞𝐭𝐚” 𝐝𝐚 𝐂𝐫𝐮𝐳 hahú kolleita jerál haree utiliza mákina modernu iha Laivai, Suku Ililai, Postu Administrativu Luatém, Munisípiu Lautém.
Iha intervista Sua Exelénsia Ministru Agrikultura Pekuária Peska no Floresta 𝐒𝐫. 𝐌𝐚𝐫𝐜𝐨𝐬 “𝐌𝐚𝐦𝐞𝐭𝐚” 𝐝𝐚 𝐂𝐫𝐮𝐳 hateten, presiza fornese ai-han ne’ebé barak kualidade no sustentavel ba komunidade sira. Tanba ida ne’e polítika nonu Governu Konstituisionál nia programa prioridade mak konstrusaun infraestrutura báziku hanesan irrigasaun.
Governante ne’e subliña presiza halo modernizasaun setór agrikultura liu husi mekanizasaun hodi utiliza mákina modernu nune’e bele fasilita agrikultór sira atu bele servisu iha sira nia natar.
Ministru Agrikultura Pekuária Peska no Floresta agradese ba Xefe Suku Ililai no Euquise ne’ebé organiza komunidade sira atu koopera ho MAPPF, Autoridade Munisípiu Lautém hodi bele hala’o natar kuda haree no rezultadu hatudu duni ba ita hotu.
Iha faitn hanesan reprezentante Prezidente Autoridade Munisipál Lautém, Sekretáriu Munisipál Assuntu Sosiais no Organizasaun Komunitária 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬 haktuir fasilidade mákina sira ne’e modernu tebes, tanba ida ne’e agrikultór sira utiliza mákina sira ne’e ho responsabilidade, atu nune’e mákina modernu ida ne’e bele utiliza iha tempu naruk nia laran.
Sekretáriu Munisipál ne’e subliña fasilidade sira ne’e movel ne’ebé sei apoiu agrikultór sira ne’ebé iha natar hanesan, Postu Iliomar, Luro no fatin sira seluk iha Munisípiu Lautém, nune’e husu ba kada grupu bainhira utiliza mákina modernu ida ne’e ho responsabilidade.
Kona-ba armazén, reprezentante Prezidente Autoridade Munisipál Lautém konfirma, Xefe Suku Ililai nia proposta submete ona ba iha Autoridade Munisipál Lautém hodi konsidera sai prioridade liu husi Konsellu Konsultivu Munisipál (KKM) ne’ebé planu sei harii armazén ida hodi agrikultór sira bele rai haree ho dignu.
𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢
𝐋𝐨𝐬𝐩𝐚𝐥𝐨𝐬, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟐𝟗 𝐉𝐮ñ𝐮 𝟐𝟎𝟐𝟔
Autoridade Munisipál Lautém liu husi reprezentante Prezidente Autoridade Munisipál Lautém 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬, Sekretáriu Munisipál Planeamentu Investimentu no Dezenvolvimentu Integradu (PIDI) Xefe Gabinete Prezidente Autoridade, Diretor Servisu Munisipál, Xefe Departamentu sira no Diretor/a Delegasaun Teritorial sira partisipa Misa Agradesimentu ba Selebrasaun Mahein São Paulo Lospalos.
Ohin uma Kreda Lospalos hala’o Misa Agradesimentu hodi selebra Santo na’in rua mak hanesan São Paulo no São Pedro ne’ebé importante nu’udar airin fiar uma kreda universal, São Pulo mós sai nu’udar mahein ba Paroquia Lospalos ne’ebé tau matan sarani sira durante tinan 42.
Misa Agradesimentu ne’e dirije husi 𝐏𝐞. 𝐉𝐮𝐬𝐭𝐢𝐧𝐢𝐚𝐧𝐨 𝐝𝐞 𝐒𝐨𝐮𝐬𝐚 𝐒𝐃𝐁, Misa Agradesimentu ne’e nu’udar pasu importante ida ba Sarani Lospalos, hodi bele hametin liu-tán fiar no hanesan joven labele sai matenek de’it iha kakutak, maibé tenke matenek iha hahalok, matenek iha komportamentu atu defende valór Maromak nian.
Iha Misa Agradesimentu ne’e partisipa mai husi Autoridade Munisipál Lautém ho estrutura, Komandante Polísia Nasionál Timor-Leste (PNTL) Munisípiu Lautém ho membru sira, Amo Paroquia Mehara no Luro, Amo Vigariu Paroquial Lautém ho Luro, Amo Diretor de Casa aumesmu Vigariu Paroquial São Lospalos, Diagno sira, konsellu nasionál Paroquia, Prezidente Antigu Alunus ho membru sira, Madre sira no sarani sira hotu.
𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢
𝐋𝐨𝐬𝐩𝐚𝐥𝐨𝐬, 𝐊𝐢𝐧𝐭𝐚-𝐟𝐞𝐢𝐫𝐚, 𝟐𝟓 𝐉𝐮𝐧𝐮 𝟐𝟎𝟐𝟔
Ohin Autoridade Munisipál Lautém hamutuk ho Sekretariadu Polítika Partidu Fretilin Munisipál realiza Missa Requem Falisimentu Saudozu 𝐃𝐫. 𝐅𝐫𝐚𝐧𝐜𝐢𝐬𝐜𝐨 𝐆𝐮𝐭𝐞𝐫𝐞𝐬 “𝐋𝐮-𝐎𝐥𝐨” ne’ebé dirije husi 𝐏𝐞. 𝐉𝐮𝐬𝐭𝐢𝐧𝐢𝐚𝐧𝐨 𝐝𝐞 𝐒𝐨𝐮𝐬𝐚 𝐒𝐃𝐁 iha Paróquia São Paulo Lospalos.
Iha Missa Requem ne’e partisipa mai husi Autoridade Munisipál Lautém, Instituisaun Estadu sira iha Munisípiu Lautém, Funsionáriu sira, Komandante Polísia Nasional Timor-Leste (PNTL) Munisípiu Lautém no membru sira, organizasaun sosiedade sivil, estudante, Quadros Partidos Partidu Polítiku no Povu Munisípiu Lautém.
Missa Requem ne’e bazeia ba orientasaun husi 𝐒𝐮𝐚 𝐄𝐱𝐞𝐥𝐞𝐧𝐬𝐢𝐚 Primeiro Ministro Interino 𝐒.𝐄. 𝐄𝐧𝐠. 𝐌𝐚𝐫𝐢𝐚𝐧𝐨 𝐀𝐬𝐚𝐧𝐚𝐦𝐢 𝐒𝐚𝐛𝐢𝐧𝐨 liu husi Ministério Administrasaun Estatal (MAE) katak Autoridade Munisípio hotu hotu organija Missa requem ba Falesimentu Saudozo 𝐃𝐫. 𝐅𝐫𝐚𝐧𝐜𝐢𝐬𝐜𝐨 𝐆𝐮𝐭𝐞𝐫𝐞𝐬 “𝐋𝐮-𝐎𝐥𝐨” nian iha kada Munisípio. Iha biban ida ne’e Autiridade Munisípio Lautém hamutuk ho Partido Fretilin Munisípio Lautém realiza Missa requem liu husi Celebrasaun Eucaristia iha Igreja 𝐒ã𝐨 𝐏𝐚𝐮𝐥𝐨 Losplos.
𝙍𝙚𝙢𝙖𝙩𝙖
(𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢)
𝐋𝐨𝐬𝐩𝐚𝐥𝐨𝐬, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟐𝟐 𝐉𝐮𝐧𝐮 𝟐𝟎𝟐𝟔
Ofisiál Senior Embaxada Australia ba programa PARTISIPA (𝐒𝐫. 𝐉𝐨𝐬𝐞 𝐌𝐚𝐫𝐜𝐚𝐥) no Deputy Team Leader (𝐒𝐫. 𝐀𝐛𝐢𝐥𝐢𝐨 𝐀𝐫𝐚𝐮𝐣𝐨) ho ekipa hamutuk ho ekipa PARTISIPA halao reuniaun kortezia ho Prezidente Autoridade Munisipal Lautem-Internu. Objetivu hosi reuniaun ne’e atu introdús programa PARTISIPA ba Faze-II no aprezenta staff rekrutadu foun PARTISIPA ba Autoridade Munisipal Lautem hodi hala’o knaar no apoiu servisu iha área Planeamentu no Orsamentu Inkluzivu no Infraestrutura Reziliente, enkontru ne’e hala’o iha Sala VIP Administrasaun Autoridade Munisipal Lautem.
Iha intervensaun, Prezidente Autoridade Munisipál-Interinu, 𝐒𝐫. 𝐙𝐞𝐟𝐞𝐫𝐢𝐧𝐨 𝐝𝐨𝐬 𝐒𝐚𝐧𝐭𝐨𝐬 𝐒𝐞𝐪𝐮𝐞𝐢𝐫𝐚, lori Autoridade Munisipál Lautém hakarak agradese ba Governu Australia nian kometimentu hodi fó apoiu rekursu humanu hanesan Asesór Governasaun Lokal (Sr. Elio Guimaraes) ho Koordenador foun nain rua (Sr. Licino Cunha no Sr. Corenlio Sonet) atu fo asisténsia téknika iha area governasaun, planeamentu no infrastrurura mai iha Autoridade Munisipal Lautem nian.
PAM-Internu mos salienta katak prezensa asesór PARTISIPA nian iha Autoridade Munisipal Lautem durante apoiu tebes ajuda teb-tebes iha aspeitu sira mak mensiona.
Ho ida ne’e Autoridade Munisipiu Lautem simu tan koordenadór na’in rua husi PARTISIPA nian mai iha Autoridade Munisipal Lautem hodi apoiu iha área Infraestrutura Reziliente nomos Planeamentu no Orsamentu Inkluzivu.
𝙈é𝙙𝙞𝙖 𝙋𝘼𝙈-𝙇𝙖𝙪𝙩é𝙢
© 2026 Autoridade Municipal Lautém
